×

Ika Bible 2018

Itẹn 21

1
Akpobi eze nọkẹ mirin rị e huni ẹka Osolobuẹ — Ebe ọwụlẹ sụọ Osolobuẹ k'o mẹ ẹ e shi.
2
Ihiẹn ile ịhịan e mẹ rị a mma ẹnya, kanị Osolobuẹ e lele obi ịhịan.
3
Ezi-omumẹ lẹ imẹ onyẹ ọwụlẹ k'o furu kẹ Osolobuẹ ka a nabanhan karị ịchụn-ẹjan.
4
Ẹnya mpache lẹ nhọnrọn hụn wụ ukpẹ ndị eje-omumẹ — wụchanrịn njọ.
5
Ihiẹn ile wẹ ro ọhụnma, rụnshi ẹ ikẹn, a ban erere, kanị onyẹ a hụhụnị a dan ogbẹnnyẹ.
6
Akụ-lẹ-ụba wẹ gi ntụ kpa wụhụ igirigi e fopụnị lẹ ọnyan e gbuni.
7
Ẹka-ikẹn ndị eje-omumẹ k'a dọkpụnpụ wẹ lẹ enwẹn wẹ, makẹni ekweni wẹ mẹ ihiẹn rị mma.
8
Obibi onyẹ njọ ara zinrin, kanị obibi onyẹ ẹka a rị ọchan kụrụ ọtọ.
9
Ọ ka mma nị ịhịan kaperi nkọ ohu elu ụlọ karị isọn nwunyẹ e kpe ikpe-ikpe biri mmụlọ.
10
Ẹgụn eje-ihiẹn a gụn ndị eje-omumẹ; w'a ra mẹ omikẹn ibe wẹ.
11
Wẹ ye onyẹ-nlelịa afụnfụn, onyẹ nwọnlẹni hụn ọ marịn e nwọnrin uche; kanị wẹ kuzihụ onyẹ nwọn uche, ọ marịn ihiẹn.
12
Chuku hụn wụ Onyẹ Ezi-omumẹ hụ a hụn ihiẹn rị e mẹ iwe ndị eje-omumẹ, e mẹ ndị eje-omumẹ a la iwi.
13
Onyẹ fakin ntịn ebe ndị igbẹnnyẹ rị a kwan, ya nwẹn k'a kwan onwọnni onyẹ k'a zan'a.
14
Ihiẹn wẹ gi nzuzue ye a rọ olulu, egho-azụụn wẹ faye ịhịan ẹkpa a rọ eje-ọnụma.
15
Ezioku pụha ifọn, ndị ezi-omumẹ a ghọghọ, okẹn egun a tụma ndị e mẹ eje-ihiẹn.
16
Onyẹ hụn gha ụzọ nghọta pụ, jẹnkọ a nọ igunrun ndị nwụnhụnnị zu ikẹn.
17
Onyẹ hụn a chọ ẹhụ-ufu ẹhụ-ufu k'a dan ogbẹnnyẹ; onyẹ ọwụlẹ manya lẹ udẹn a sụọ k'a dan ogbẹnnyẹ.
18
Isi ndị eje-omumẹ kẹ wẹ gi a gbarị nke ndị ezi-omumẹ; nke ndị kụrụlẹni ọtọ kẹ wẹ gi a gbarị nke ndị kụrụ ọtọ.
19
Ọ ka mma nị ịhịan biri imẹ ọfịa karị nị ya lẹ nwunyẹ e mẹ oku, e bu olulu, bi.
20
Ezigbo ihiẹn lẹ ofugbọn rị iwe onyẹ marịn ihiẹn, kanị onyẹ nwọnlẹni uche e ripụchanrịn ihiẹn o nwọn.
21
Onyẹ hụn a chọ ezi-omumẹ lẹ ihiẹn-ọsụsụọ a hụn ndụn, aghamihun lẹ ọghọ.
22
Akpụ onyẹ ohu nwọn uche k'a s'ẹka fedẹ mgbọn obodo ndị odogun-agha bu ọda rị, tikpọpụ ihiẹn hụn wẹ gi dọn ẹnya.
23
Onyẹ hụn e kwọndọn ọnụ a lẹ ire ẹ rị a napụ enwẹn ẹ nsọngbu.
24
Onyẹ mpache hụn e mẹkarị enwẹn ẹ — ẹfan a wụ “Onyẹ-nlelịa”; ọ gụnchanrịn agụngụn onyẹ enwẹn ẹ jun ẹfọ.
25
Ihiẹn a gụn onyẹ-nzụnzụn k'a gụngbu ẹ, makẹni ọ jụgụọ ịrụn ọrụn —
26
ẹnya-ẹnya kẹ ihiẹn a la a eki e we gi, kanị onyẹ ezi-omumẹ a ha ẹka-ẹka.
27
Ẹjan ndị eje-omumẹ a chụn wụ arụ ẹnya Osolobuẹ — ọrịwụzị hụn wẹ bu eje-ihiẹn obi wẹhẹ!
28
Ọshẹri-ntụ kumẹ, a jụgbọ wẹ oku ye ẹ ọnụ, kanị onyẹ hụn lebangụ oku ẹnya kumẹ o kusọnmẹ.
29
Onyẹ eje-omumẹ a gan agan, kanị onyẹ ezi-omumẹ e lekpọ ihiẹn e mẹ.
30
Onwọnni amamihiẹn mọbụ nghọta mọbụ ndụnmọdụn hụn wẹ gi e mẹri Osolobuẹ.
31
W'a kwademẹ ẹshin a tọnị ụhụọhịn agha, kanị ẹka Osolobuẹ kẹ mmẹri rị.
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc
:
Save Notes