|
| 1 |
|
| Khuehtawn a yet lakah ming then tuek lah. Tangka lakah, sui lakah, mikdaithen ni aka then. |
|
| 2 |
|
| Hlanglen neh khodaeng khaw humcui uh. Amih boeih te khaw BOEIPA long ni a saii. |
|
| 3 |
|
| Aka thaai long tah a thae a hmuh vaengah thuh la thuh uh. Tedae hlangyoe long tah a paan dongah lai a sah van. |
|
| 4 |
|
| Kodonah neh BOEIPA hinyahnah kah thapang tah, khuehtawn, thangpomnah neh hingnah la om. |
|
| 5 |
|
| Voeldak kah longpuei ah pael phoh neh a hling a hang om. A hinglu aka ngaithuen long tah te te a lakhla tak. |
|
| 6 |
|
| Camoe te a long rhai ah nawn laeh. Te daengah ni a patong vaengah te lamkah te a nong pawt eh ni. |
|
| 7 |
|
| Hlanglen loh khodaeng a ngol thil tih cangpu aka rhong khaw cangpu aka hlah hlang kah sal la om. |
|
| 8 |
|
| Dumlai aka soem loh boethae te a ah rhoela a ah. Tedae amah kah thinpom caitueng loh a khah bitni. |
|
| 9 |
|
| A mik aka then loh a buh te tattloel taengah a tael pah tih a yoethen bitni. |
|
| 10 |
|
| Hmuiyoi te haek lamtah olpungkacan te phuei saeh. Te vaengah dumlai neh a yah neh kangkuen saeh. |
|
| 11 |
|
| Lungbuei cim aka lungnah hlang tah a hmuilai khaw mikdaithen la om tih, manghai kah a paya la poeh. |
|
| 12 |
|
| BOEIPA kah mik loh mingnah te a kueinah tih, hnukpoh kah olka te a paimaelh pah. |
|
| 13 |
|
| Kolhnaw long tah, “Kawtpoeng neh toltung lakli kah sathueng loh ng'ngawn ni ta,” a ti. |
|
| 14 |
|
| Kholong nu kah a ka ngawn tah vaam a dung la om. BOEIPA kah kosi a sah thil te tah pahoi cungku rhoe cungku ni. |
|
| 15 |
|
| Camoe kah lungbuei ah anglat a hlaengtang pah. Thuituennah caitueng loh a taeng lamkah a lakhla sak bitni. |
|
| 16 |
|
| Amah kah rhoeng sak ham tattloel aka hnaemtaek, hlanglen taengla aka pae khaw, a tloelnah la rhep poeh ni. |
|
| 17 |
|
| Na hna kaeng lamtah aka cueih rhoek kah olka te hnatun, kai kah mingnah he na lungbuei ah dueh lah. |
|
| 18 |
|
| Te te na ngaithuen atah na bung khuiah khaw dingsuek vetih, na hmuilai dongah khaw boeih cikngae ni. |
|
| 19 |
|
| Tihnin ah namah khaw, na pangtungnah te BOEIPA dongah khueh sak ham ni, nang kan kam ming sak. |
|
| 20 |
|
| Hlavai kah cilkhih neh mingnah sawmthum te nang hamla kan daek moenih a? |
|
| 21 |
|
| Oltak ol te a tiktam la nang ming sak ham, oltak ol neh na thuung ham neh na tueih ham dae ni. |
|
| 22 |
|
| Tattloel tah a tattloel oeh dongah rheth boeh. Mangdaeng te khaw vongka ah phop boeh. |
|
| 23 |
|
| BOEIPA loh amih kah tuituknah te a rhoe pah vetih, amih aka mom rhoek te a hinglu a mom pah ni. |
|
| 24 |
|
| Thintoek hlang te luem puei boeh. Sue la aka om hlang taengah khaw mop boeh. |
|
| 25 |
|
| Anih kah caehlong, caehlong ah na cang vetih, na hinglu te hlaeh dongah na man sak ve. |
|
| 26 |
|
| Kut yut rhoek lakli ah, laiba dongah rhi aka khang rhoek lakli ah khaw, om boeh. |
|
| 27 |
|
| A thuung ham na khueh pawt atah, balae tih, namah yueng la na thingkong te khuen saeh ne. |
|
| 28 |
|
| Khosuen kah khorhi, na pa rhoek loh a suem te rhawt boeh. |
|
| 29 |
|
| Hlang ke na hmuh vaengah a bisai thai nen ni manghai rhoek kah mikhmuh ah a pai eh. Hlang mailai tah a mikhmuh ah pai mahpawh. |
|
|
|
|