×

Ika Bible 2018

Itẹn 26

1
Oyi ara tụ ogẹn uwowo; mirin ara zue ogẹn ọkọkị; mgbaye ara furu onyẹ-nzuzu.
2
Ọnụ wẹ bụ onyẹ mẹlẹni ihiẹn w'a bụnị ọnụ ara ru ẹ ẹhụ — ọ nọhụ kẹ nnụnụ rịhụ e fe nku kpakpakpa bụ ara beri mọbụ hụn fekọhụ ozigbo-ozigbo.
3
Mkpịnsịn kẹ w'a fịan ẹshin, okẹnmẹ kẹ wẹ e kẹnmẹ ọnụ jaki, mkpịnsịn kẹ w'a fịan onyẹ nzuzu ụgba-azụụn.
4
Ashịarịlẹ onyẹ nzuzu oku k'o dọn ku ẹ, amamgbe ịyụ nwẹn a nọ kẹ ịya.
5
Shịarị onyẹ nzuzu ihiẹn nzuzu ọ rị e ku, amamgbe o weri ẹ n'o nwọnkẹ uche.
6
Ibu ozi che onyẹ-ẹwobi ẹka nọ kẹ ibepụ enwẹn i ụkụ mọbụ ibu ihiẹn k'e gbun'i che ọnụ.
7
Ọnụ onyẹ-nzuzu, itẹn nọhụ kẹ ụkụ dan ngụrọ.
8
Iye onyẹ ẹwobi ọghọ nọ kẹ ikẹnmẹ akpụrụ-iyi ye araba.
9
Ọnụ onyẹ-nzuzu, itẹn nọ kẹ onyẹ-manya bu ogun.
10
Onyẹ hụn e we onyẹ-nzuzu ọrụn mọbụ e we onyẹ ọwụlẹ ghafekọnị rịhụ kẹ ọgba-ụta hụn a rụ ịhịan ẹhụ mpụ.
11
Kẹ nkitẹ dọn e rizi ẹgbọ ọ gbọ, ẹrịra kẹ onyẹ-nzuzu dọn e zuzudọnzi nzuzu o zuzu.
12
Y'a hụnghọ onyẹ a sị enwẹn ẹ n'ọ marịnka ihiẹn? O k'a rịnị onyẹ-nzuzu mma karị hụnyẹ.
13
Onyẹ-nzụnzụn a sị, “Ẹwọrọ rị ụzọ; ẹwọrọ rị ogbe e jẹnhunmẹ!”
14
Kẹ ẹhue dọnhụ e shi azụụnnị lẹ azụụnnị, ẹrịra kẹ onyẹ-nzụnzụn e kpereshi azụụnnị lẹ azụụnnị elu-ukpo.
15
Onyẹ-nzụnzụn e bu ẹka a tọ imẹ afẹrẹ; nzụnzụn ara nị a wepụha a buche ọnụ.
16
Onyẹ-nzụnzụn weri ẹ nị ịya ka ihiẹn a marịn karị madụ ẹsa gi uche e ku.
17
Onyẹ ghafekọnị bu enwẹn ẹ che oku wụlẹni nke ẹ nọhụ kẹ onyẹ dọdọn nkitẹ ntịn.
18
Onyẹ-ẹra hụn rị a gba ụta lẹ ọkụn mpụ
19
lẹ onyẹ hụn e dufiegụ ibe ẹ, a sị, “Egu kẹ m rịhụ e gu” wụ ohu.
20
Nkụn rịlẹn'a, ọkụn e tinyụn; ọghẹlẹ rịlẹn'a, ikpe e bi.
21
Ikeke unyin lẹ ikeke-ọkụn wị; nkụn lẹ ọkụn wị; onyẹ ikpe lẹ ikpe wị.
22
Oku-ọnụ onyẹ asịsị-ire nọ kẹ ihiẹn-oriri mẹ kịrị-kịrị a sụọ ụsụọ, o rudẹ ịhịan alị-ẹfọ.
23
Ọnụ-ọma ya lẹ eje-obi wị nọhụ kẹ ihiẹn-ụrụa wẹ gi siliva nyankwama.
24
Ịhịan e bu iwe ịhịan obi, e gi ọnụ-ọma e kpumẹ enwẹn ẹ, kanị ẹro k'ọ rị e mẹ.
25
Ọsụọn'a nị oku-ọnụ a a sụọka ụsụọ, egilẹ ẹ dọn, makẹni arụ ile zu ọnụ imẹ obi ẹ.
26
Ikẹnkwọ n'o gighọ ẹro kpumẹ iwe rị a ẹfọ, kanị eje-omumẹ ẹ k'a wa ebe ịhịan ile rị.
27
Ịhịan gutọnị ibe ẹ mgbugbu, ya nwọn danban a; ịhịan kpere ọmụma kwasị ibe ẹ, o k'e kperekin d'e kunrun ẹ.
28
Ọnụ e buokin ịhịan ọnụ bu iwe ẹ obi, oku ọnụnụ-ire e wiwi ihiẹn ọda-ọda.
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc
:
Save Notes