×

Ika Bible 2018

Itẹn 3

1
Nwa m, azọkwọlẹ ihiẹn m kuzi i, ka bu ihiẹn m sị ị mẹ che obi i,
2
makẹni wẹ k'e mẹ i tọ, wẹhẹn'i aghamihun.
3
Enwọnbehikwọlẹ ihiẹn-ọsụsụọ mọbụ wụbehi onyẹ wẹ gi e dọn ẹnya; yiri wẹ olu lekẹ ihiẹn-olu; de wẹ ye akpobi i.
4
Y'e gi ẹ nwọnrin aghamihun, wụrụ onyẹ nwọn uche — kẹ ebe Chuku rị kẹ ebe ịhịan rị.
5
Gichanrịn obi i ile danbemẹ Osolobuẹ, egikwọlẹ nghọta ị dọn ẹnya;
6
Imẹ ihiẹn ile y'e mẹ, jụgụ a ọnụ, o k'a kwan'ị ụzọ.
7
Erolẹ nị y'a marịnghọ ihiẹn — ka gi egun Osolobuẹ la eje-ihiẹn tọ.
8
Ọhụn k'e wẹhẹn'i ẹhụ ikẹn, wụrụzịkwọ ọgụn ọkpụkpụ ị gi e ze.
9
E gi ihiẹn i nwọn e ye Osolobuẹ ọghọ, ya lẹ mkpụrụ-ibuzọ ile gha ugbo i pụha;
10
kẹni ihiẹn-oriri jun ọban ị, junpụha, ihiẹn w'a ra e jun ebe y'e butọ a pụ ọnụ.
11
Nwa m, elegberikwọlẹ ẹka-ntịn Osolobuẹ a dọ ị, ọ jụgbọ ị, ewekwọlẹ iwe.
12
Onyẹ ihiẹn ẹ sụọ Osolobuẹ k'ọ dọ ẹka-ntịn kẹ nẹdi e mẹ nwa a ihiẹn ẹ a sụọ a.
13
Onyẹ nwọnhẹn amamihiẹn e nwọngụọ ngọzi, ya lẹ onyẹ nwọnhẹn nghọta;
14
makẹni amamihiẹn ka siliva erere a ban, ịya kazị goru erere a ban.
15
Ịya ka ejije ile mkpa a rị — onwọnni ihiẹn w'a chọ achọ w'e gi jen'ẹ.
16
Ụtọmị rị a ẹka-nni; akụ-lẹ-ụba lẹ ọghọ rị a ẹka-ekpẹn.
17
Ụzọ ile o dushi ịhịan a sụọchanrịn ụsụọ, ụzọ ile o dushi ịhịan wụ udọn-udọn.
18
Amamihiẹn wụ osisi e ye ndị nwọnhẹnn'ẹ ndụn; o k'a rịnị ndị hụn kwọnkẹnmẹn'ẹ mma.
19
Amamihiẹn kẹ Osolobuẹ gi gbe iyetọ ụwa, nghọta k'o gi dọnmẹ igwere ebe o dọnmẹ ẹ;
20
ihiẹn ọ marịn k'o gi mẹ mirin gha imẹ-imẹ alị tikpọpụha isi mbidọn; ịya k'o gizi e mẹ orukpu e ziẹntu igirigi.
21
Nwa m, anịkwọlẹ ihiẹn ndịnị nahịn ị; kwọnkẹnmẹ amamihiẹn lẹ igi ezigbo uche e mẹ ihiẹn.
22
Kẹni wẹ hụn ụzọ wụrụnị ị ndụn, wụrụnị ị ihiẹn-olu wẹ gi chọ ị mma.
23
Y'a hụn ụzọ e jẹn ebe i jẹnkọ, ihiẹn emẹkọ ị, ụkụ ị a kpọkọ ihiẹn;
24
i dinẹ, egun atụkọ ị; i dinẹ n'ị ranhịn, ụran a sụọn e buru i.
25
Atụlẹ egun nsọngbu idẹnmuzi mọbụ egun ntikpọ hụn e kunrun ndị e mẹ eje-ihiẹn.
26
Makẹni Osolobuẹ k'a rị ị azụụn, o k'e chemẹ ụkụ ị makẹ ọ gha a dan ọnyan.
27
Egikwọlẹ ihiẹn ru ịhịan jọ a ẹfọ, omẹni ẹka ị k'ọ rị.
28
Asịlẹ ibe i, “Jẹn n'i bịa — ekile kẹ m'e ye y'ẹ” — bụ i gihụ a kikẹnni.
29
A chọlẹ ibe i njọ, onyẹ hụn bikunman'ị, nwọnlẹni ihiẹn ọ rị e ro.
30
Ekpelẹ ịhịan mmakalaka — bụ onwọnni eje-ihiẹn o mẹ i.
31
Anịlẹ elu eje-ịhịan la ị ẹnya, elerilẹ ẹ bi kaka;
32
makẹni ize kẹ onyẹ ghẹrẹ-ghẹrẹ-ghẹrẹ e zedẹ Osolobuẹ, kanị nke onyẹ e dọnmẹ ẹka a ọchan, Osolobuẹ a gwad'a uche ẹ.
33
Ọnụ kẹ Osolobuẹ a bụ ikpụlọ eje-ịhịan, kanị ngọzi k'ọ gọzi ikpụlọ onyẹ ezi-omumẹ.
34
Olelịa kẹ Osolobuẹ e lelịa ndị-nlelịa, kanị o mẹyeni ndị e welụa enwẹn wẹ alị.
35
Onyẹ nwọn uche jẹnkọ d'e nwọnrin mgbaye, kanị ịfa kẹ onyẹ nzuzu sikọ d'e nwọnhẹn.
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc
:
Save Notes