|
| 1 |
|
| Ndịnị wụ oku Aguru nwa Jakẹ ku — Osolobuẹ sị a ku ẹ: okẹnnyẹni gwa Itiẹlụ oku — Itiẹlụ lẹ Ụkalụ k'ọ gwa a, ọ sị, |
|
| 2 |
|
| “Mmẹ kachanrịn ịhịan ile e zuzu; enwọndẹ m nghọta kẹ ịhịan. |
|
| 3 |
|
| M'e ke mụrụn amamihiẹn, amarịnzịkwọ m Onyẹ-ahụn Rị Nsọ. |
|
| 4 |
|
| Onyẹ jẹntu elu-igwee hidan? Onyẹ gitu ẹka kpọnrin ufere? Onyẹ gitu mgburu ẹ fụma mirin rị igwere? Onyẹ mẹ ụwa ru ebe ile o ru? Kị wụ ẹfan a lẹ ẹfan nwa a? Gwa m — omẹni y'a marịnghọ! |
|
| 5 |
|
| Oku ile Chuku ku furu wẹ gi e dọn ẹnya; Chuku e che ndị ile gbaburun'ẹ nche. |
|
| 6 |
|
| Ekukarịkwọlẹ hụn o ku, makẹ ọ gha a jụgbọ ị, ghọsị n'ị wụ onyẹ-ntụ. |
|
| 7 |
|
| Ihiẹn ẹbụọ kẹ m rị a rịọ ị, Osolobuẹ; dodo yekwọ m'a m gini d'a nwụn: |
|
| 8 |
|
| Wezụkachanrịn ẹro lẹ ntụ ebe m rị; anịlẹ m dan ogbẹnnyẹ mọbụ hi ọdanfịn, ka e ye m hụ ihiẹn e zu m e ri ụhụọhịn-ụhụọhịn. |
|
| 9 |
|
| Amamgbe m'e rijunmẹ ẹfọ, gbakitọ ị azụụn, sị, ‘Onyẹ wụ Osolobuẹ?’ Mọbụ a dan m ogbẹnnyẹ, zun ohin, gi ẹ budan ẹfan Chuku m. |
|
| 10 |
|
| “Ekinkwọlẹ odibo nwọnlẹni ihiẹn o mẹ ye di-nwọnn'ẹ, amamgbe ọ bụ ị ọnụ, ikpe a ma ị. |
|
| 11 |
|
| O nwọnghọ ndị a kpọ nẹdi wẹ iyi, agbọ ghalẹni a gwa nnẹ wẹ oku rị mma. |
|
| 12 |
|
| O nwọnghọ ndị hụn e ro ni wẹ rị ọchan bụ wẹ e ke sụpụ wẹ nsịn hụn ru wẹ unyin. |
|
| 13 |
|
| O nwọnghọ ndị a pachesọnmẹni, e legberi ndị ọzọ. |
|
| 14 |
|
| O nwọnghọ ndị eze rị wẹ ọnụ nọ kẹ ọpịa-agha, ndị agban wẹ nọ kẹ ẹbeke — wẹ chọ nị wẹ ripụ ndị igbẹnnyẹ elu-ụwa, ripụ ndị nwọnlẹni ịhịan — wepụ wẹ imẹ ndị rị ndụn. |
|
| 15 |
|
| Ẹkọrọn mụ ikpoho ẹbụọ: ‘Ye m! Ye m!’ Ịya kẹ w'a kwansọnmẹ. O nwọnghọ ihiẹn ẹtọ ẹfọ ghalẹni e jun — ihiẹn ẹnọ-dẹ hụn ghalẹni a sị, ‘O highọ’: |
|
| 16 |
|
| ili lẹ ẹfọ agan, lẹ alị hụn ẹfọ mirin ghalẹni e jun lẹzi ọkụn hụn ghalẹni a sị, ‘O highọ!’ |
|
| 17 |
|
| “Ẹnya hụn a mụ nẹdi ẹ ẹmụ, e legberi oku nnẹ ẹ, nnụnụ rị ọdanmgbugbu k'a gụpụha a, ụmụ udele e ri ẹ. |
|
| 18 |
|
| Wẹ rị ihiẹn ẹtọ a tụ m ẹnya ọda-ọda — ihiẹn ẹnọ-dẹ — hụn m ghọtalẹni: |
|
| 19 |
|
| kẹ ugọn dọn e fe imẹ elu, kẹ agwọ dọn a gha elu ọmụma, kẹ ụgbọ-mirin dọn a gha ahanmahan okẹn ohimin lẹzi oku okẹnnyẹ lẹ nwagbọọ. |
|
| 20 |
|
| “Lee kẹ okpoho hụn a zọ ụkụ e ye ọfịa e mẹ: o ri, o finchanpụ ọnụ, ọ sị, ‘Onwọnni eje-ihiẹn m mẹ!’ |
|
| 21 |
|
| O nwọnghọ ihiẹn ẹtọ hụn e mẹ ụwa e mẹhunmẹ: ihiẹn ẹnọ-dẹ hụn ụwa ghalẹni as'ẹka e din: |
|
| 22 |
|
| odibo hụn họnrin eze, onyẹ-nzuzu rị e rijun ẹfọ, |
|
| 23 |
|
| okpoho ihiẹn ẹ sụọlẹni di ẹ lẹzi odibo narịn okpoho ọ rị iwe ẹ di ẹ. |
|
| 24 |
|
| O nwọn ihiẹn ẹnọ mẹ ẹkẹrẹ, kanị wẹ nwọn uche ọda-ọda: |
|
| 25 |
|
| Ndandan enwọnkẹni ndụn, kanị w'e gi ogẹn anwụn e butọ ihiẹn-oriri; |
|
| 26 |
|
| Ẹlẹtu-ọmụma enwọnkẹni ndụn, kanị imẹ ọmụma kẹ wẹ e bi. |
|
| 27 |
|
| Igurube enwọn eze, kanị w'e gi usọnrọn e jẹn. |
|
| 28 |
|
| Wẹ e gi ẹka mmaka a nwụndọn ngwẹnrẹn, kanị ọ banyedẹ obi-eze. |
|
| 29 |
|
| O nwọnghọ ihiẹn ẹtọ e jẹn ‘Mmẹ-nwọn-alị, mmẹ-nwọn-alị’ — ihiẹn ẹnọ-dẹ hụn e jẹn nọ kẹ sị uwẹ nwọn ụwa: |
|
| 30 |
|
| ẹwọrọ hụn ka anụ ndị ọzọ ndụn enwọn, hụn nwọnlẹni ihiẹn ọ gbanị ọsọ; |
|
| 31 |
|
| ọkpa rị e jẹnhunmẹ imẹ igunrun nneku lẹ mkpịn lẹzi eze hụn ndị-agha a nọhunmẹ. |
|
| 32 |
|
| “Omẹni y'e zuzugụọ bushi enwẹn i elu mọbụ mama eje-ihiẹn, gikwọ nwan ẹka kpumẹ ọnụ! |
|
| 33 |
|
| Makẹni, wẹ gbe mirin-ẹran, ọ rọ, wẹ fị imi, ọ gba ẹdeke; ẹrịrazịkwọ, wẹ kpasu ịhịan iwe, oku e se.” |
|
|
|
|