×

Ika Bible 2018

Itẹn 31

1
Ndịnị wụ oku eze wụ Lẹmuẹlụ ku — ozi rọ; ihiẹn nnẹ ẹ kuzi ẹ rọ:
2
“Euu nwa m; nwa ẹfọ m; nwa m gi nkwa m kwe nwọnhẹn,
3
anịlẹ oku okpoho mịra ndụn rị ị ẹhụ anịl'a, makẹni o wiwi ndị-nze.
4
Euu Lẹmuẹlụ, ndị-nze efuruni — ndị-nze efurukwọnị a ra manya, ndị-ọkịkị efuruni a ra manya a tụnị,
5
amamgbe w'a ragụ, a zọ wẹ ihiẹn iwu ku, napụsọnmẹ ndị igbẹnnyẹ ihiẹn runi wẹ.
6
We manya a tụnị ye ndị lakọ iwi, we manya ye ndị ụya rị e ri;
7
nị wẹ ra, zọ elu rị a fụnị wẹ, nyanhanbehi ụya rị e rini wẹ.
8
E kuni ndị nwọnlẹni ọnụ ọnụ wẹ, y'a zụọyeni ndị nwọnlẹni onyẹ e yeni wẹ ẹka.
9
Agbakwọlẹ nkịtịn; a han ezigbo eṅẹn; anịlẹ wẹ mẹgbu ndị igbẹnnyẹ lẹ ndị nwọnlẹni ịhịan.”
10
Onyẹ k'a s'ẹka hụn ezigbo nwunyẹ? Ịya ka ejije a ṅanran ọhụnma-ọhụnma!
11
Di ẹ gi ẹ e dọn ẹnya — ezigbo ihiẹn ara kọ di ẹ.
12
O we nwụn, ihiẹn rị mma k'o wẹhẹni di ẹ, ẹlẹ eje-ihiẹn.
13
Ọ chọrị ẹṅẹnrẹn anụ lẹ oruru rị mma o gi a kpa ẹkwa; ọ sụọ a n'o gi ẹka a a lụrụ.
14
Ọ nọ kẹ ụgbọ-mirin ndị-afịa, ọ ghadẹ ebe teni e welụa ihiẹn-oriri ẹ.
15
O lihi ebe eki kelẹni fọn e mẹmẹni ezi-lẹ-ụlọ a ihiẹn-oriri, keyesọnmẹ idibo ẹ ikpoho ihiẹn wẹ jẹnkọ d'a rụn.
16
O lelegụ alị ọhụnma, o ṅọnrin ẹ; o gi egho ẹ a gbọ vaịnị.
17
O bu enwẹn ẹ e che ọrụn a; ọ rụnshi ọrụn a ikẹn.
18
Ọ marịnghọ erere o k'e gi lụa afịa; ukpẹ ẹ ara nwunbehi imẹ uhinhin.
19
Ẹka a ohu rị oruru, ẹka a hụn ẹbọ rị ihiẹn o gi a tụ oruru.
20
Ọ yeni ndị igbẹnnyẹ ẹka, e yesọnmẹni ndị mkpa gi ẹka.
21
Ara hue uhue makẹ ezi-lẹ-ụlọ a ogẹn oyi, makẹni wẹ ile yi ezigbo ẹkwa a chụ oyi.
22
O mẹmẹrin ẹkwa wẹ gi e dinẹ, ezigbo ẹkwa linẹni lẹ ẹkwa pọpụ k'o yi.
23
Di ẹ wụ onyẹ wẹ marịn amarịn ọgwa obodo ebe ya lẹ ndị-isi ibe ẹ rị.
24
Ọ kpa ẹwuru linẹni e re, a kpazị akpụkpọ-ukun e reye ndị a zụjẹn afịa alị ọzọ.
25
O jeri ikẹn lẹ ọghọ ẹhụ kẹ ẹkwa; egun ekile ara tụ a — ọ mụdẹ ekile ẹmụ makẹni ọ kwademẹgụọ.
26
O gi amamihiẹn e ku oku, a kuzi ihiẹn furuni.
27
O lepụ ezi-lẹ-ụlọ a ẹnya ọhụnma-ọhụnma, a ra fa ẹka ye ụkụ, e che nị ịhịan ye ẹ.
28
Ụmụ a pụha, a kpọ w'a onyẹ Chuku gọzi; di ẹ nke ẹ a jazị a mma,
29
a sị, “Ikpoho bu ọda e mẹ ihiẹn rị mma, kanị ịyụ mẹkarị wẹ ile.”
30
Nị okpoho a la ẹnya, ẹlẹ ihiẹn w'e gi dọn ẹnya; mma-ẹhụ a la ala; kanị okpoho hụn a tụ egun Osolobuẹ furu w'a ja mma.
31
Kụ a ụgwọ ihiẹn-ọma ọ rụn; wẹ gi ọrụn a ja a mma ọgwa obodo.
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc
:
Save Notes