×

Ebaibuli 1961

Awaragasia 31

1
Akiro nuka ekabaka Lemuel: abwokon naesisianakini totoke,
2
Anyoika tope, okokuka? Anyoika okoku loka akoikika? Anyoika da, ijo okoku loka aiyaposioka?
3
Sirikiinak aŋor akonigogoŋ, Karaida ikonirotin neeiaas nun nuemudianarete ikabakan,
4
Mere nuka ikabakan, ijo Lemuel, mere nuka ikabakan aimat ebino; Karaida ikapolok einer atiar, “Ai bo eia nuitemerete?”
5
Kinyeis aimat, kosodete ikisila aimurwokin, Kosodete aibelokin etube loka etuŋanan kere loiticanio,
6
Koinanakinete nuitemerete ŋol loeapikinit aolior, Ebino da lueriebasi kotauon:
7
Komata, kimurwokis icanikec, Kinyeis akiitun bobo aburunikec.
8
Koon akoniituk kanuka ebaŋ, Kirabak nul kere luasilikis,
9
Kooŋ akoniituk, kotub kotenan, Kotubonokinenei lukican ka luilwaritos.
10
Aberu naejok, iŋai epedori adumun? Naarai itelekarit noi etiaike amor nukarenak nuka akais.
11
Emunokina etau loka okilenike ŋes, Kwabo mam etwaniari ameda.
12
Iswamanakini nes nuejok, kwabo mere nueroko Apaarasia kere nuka aijarake.
13
Emoi ŋesi ajulo ka abirai, Iswamai kakukuranut kakaninike.
14
Eputosi kameerin nukagwelanar, Eyaŋaununei ikenyamat kama elwana.
15
Edilokini anyoun eriŋa akwap iwalara, Einakini lukokaleke lunyaman, Ekorakini apesuruke akeeeswamisio.
16
Irerei emanikor, kosodi agwel: Araito nuka akaninike ŋes iraia emanikor loka emusabibu.
17
Eeni ŋesi anabetake kagogon, Itogogoŋi akaninike.
18
Eanyuni ebe luegwelanari einunete ameda: Mam edunei aketala kuare.
19
Ibwaikini akekanin akitoi napopiret, Itinito akekanin akitoi nawoiis eusi.
20
Igagaunit lukican kakekanin, Eebo, eriori akekanin neejaas luilwaritos.
21
Mam ekurianar ŋesi aaterot kanuka lukokaleke, Naarai enapito lukokaleke kere inapen lukarenak.
22
Iswamanakini aimuketa; Enapenenei ebaputa loejok ka lumugeik.
23
Ejenunio okilenike korutei, Iboienenei kanen kama ejaas lukapolok luka akwap.
24
Esonyununei inapen luka ebaputa kogwelanari, Ŋaikini da ikagwelanarak ausio nukanabes.
25
Inapeneke kes aibuses ka aiyoŋ; Ekieniei apaarasia nuepote,
26
Eooŋi akeituk kacoa; Aisisianakin nakasianut eiaenena anaiepeke.
27
Ericit noi iponesio lukokaleke, Ido mam enyami inyamat lukalonwanut
28
Enyounete ikedwe enyaraete nakarereŋ: Okilenike da, ituri ŋes atiar;
29
“Eswamata aŋor nuipu nuejok, Konye ca ijo nes itelekarit kere.”
30
Eisupane iŋalai, atemelel da erai alon: Konye aberu naeyonit EJAKAIT itureneneo.
31
Koinak ŋes araito nuka akaninike; Iturenenete da aswamisioke ŋes korutei.
Teso Bible 1961
Ateso Old Version Bible United Bible Societies, 1961
:
Save Notes