×

Ika Bible 2018

Itẹn 4

1
Ụmụ m, gi ni ọzụnzụn nẹdi ụnụ dọn; bu ni obi che ẹ nwọnrin uche.
2
Makẹni ihiẹn rị mma kẹ m rị a kuzi ụnụ, a latọkwọlẹ ni nwan ihiẹn m kuzi ụnụ.
3
Kẹ m rị nwa-ndu iwe nẹdi m, akpụ nwa ohu nnẹ m mụ hụn kelẹni kara,
4
nẹdi m hụ a kuzi m, a sị, “Gi obi i ile kwọndọn oku m rị a gwa ị; e mẹ ihiẹn m sị ị mẹ, kẹn'i rị ndụn.
5
Nwọnrin amamihiẹn; nwọnrin nghọta; azọkwọlẹ ihiẹn m ku mọbụ gha imẹ ẹ pụ.
6
Agbakịtọkwọlẹ amamihiẹn azụụn — o k'e dọnmẹ i; a nị ihiẹn ẹ a sụọ ị, o k'e che i nche.
7
Amamihiẹn wụ ibuzọ: nwọnrin nwan amamihiẹn. Y'e ke nwọn ihiẹn ọwụlẹ, omẹni y'e ke nwọnrin nghọta.
8
Ye ẹ ọghọ ọda-ọda, o k'e bushi i enu; dide ẹ, o k'e ye i ọghọ.
9
Amamihiẹn k'e tu i ugọn a la ẹnya, kpumẹ i okpu-eze ma mma.”
10
Gọn ntịn, nwa m, gi oku m dọn, n'ị hụn ụzọ tọ.
11
M'a ghọsị ị ụzọ amamihiẹn, m'e we i a gha ụzọ rị mma.
12
I jẹnkọnị, ụkụ ị ekporikọ; ị gba ọsọ, y'a kpọgburukọ.
13
Kwọnkẹnmẹ ihiẹn wẹ sị ị mẹ, anịl'a nahịn ị; chemẹ ẹ ọhụnma, makẹni ịya wụ ndụn ị.
14
Azọlẹ ụkụ ye ụzọ ndị-ejẹ a gha mọbụ gha ụzọ ndị e mẹ eje-ihiẹn a gha.
15
Jụ obibi wẹ; aghalẹ ụzọ hụ; la a tọ, jẹnmẹ ebe i jẹnkọ.
16
Makẹni wẹ ara s'ẹka ranhịn mmanị wẹ mẹgụ eje-ihiẹn; ụran ara tụ wẹ mmanị wẹ mẹgụ ịhịan dan.
17
Njọ kẹ wẹ gi a hụn e ri, ẹka-ikẹn kẹ wẹ gi a hụn a ra.
18
Kanị ụzọ onyẹ ezi-omumẹ nọ kẹ eki rị e fọnni, hụn e fọnwaye ofọnwaye-ofọnwaye d'e runi o fọnchanrịn.
19
Ụzọ ndị njọ nọ kẹ ẹkpa-ishi; w'a ra marịn ihiẹn ụkụ wẹ kpọgburu.
20
Nwa m, bu obi i che ihiẹn m rị e ku; gọn ntịn oku m ọhụnma-ọhụnma.
21
Anịkwọlẹ ẹnya ị pụ a, ka bu ẹ che imẹ obi i;
22
makẹni w'e ye ndị nwọnhẹnni wẹ ndụn, e mẹ ẹhụ a rịchanrịn wẹ ikẹn.
23
Lịlịmakwọ n'ị dọnmẹ obi i ọhụnma, makẹni ịya e ropụha elu y'e bi.
24
Wepụ eje-oku ọnụ ị; wepụ oku rụnị ụgb'ọnụ ị.
25
Buchanrịn ẹnya zinmẹ ibe ihun; bu ẹnya che ebe i jẹnkọ.
26
Beni ụkụ ị ụzọ riẹnni gha, kẹni ụzọ ị ile rịchanrịn mma.
27
Akụyelẹ ẹka-nni mọbụ ẹka-ekpẹn; Gha imẹ eje-ihiẹn pụ.
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc
:
Save Notes