×

Ika Bible 2018

Itẹn 8

1
Ẹlẹ Amamihiẹn rị a hị ihiẹnni? Ẹlẹ Nghọta weshi olu ahụn elu a hị?
2
Mkpọnụnụ ebe ile jẹn elu mkpẹnrẹn ụzọ k'o wuzosọnmẹ ya lẹ ebe ụzọ nọsọnmẹ wa ẹbụ;
3
ụsụọ ọnụ-mgbọn ile w'a gha a banye imẹ obodo lẹ ọnụmụzọ ile rị ichẹn-ichẹn, k'ọ nọsọnmẹ a hị, a sị:
4
“Ụnụ ile! Ụnụ kẹ m rị a hị; ịhịan ile kẹ m weshini olu elu a kpọ.
5
Ụnụ ndị nwọnlẹni hụn wẹ marịn, nwọnrin ni uche; ndị-nzuzu, nwọnrin ni nghọta.
6
Gọn ni ntịn, n'o nwọn ihiẹn rịgbu enwẹn ẹ mkpa m k'e ku; m k'a shịapụ ọnụ m ku ihiẹn rị mma.
7
Ezioku sụọ kẹ ọnụ m e ku; eje-ihiẹn e zedẹ ọnụ m ize.
8
Oku-ọnụ m ile rịchanrịn mma ẹnya Osolobuẹ, onwọnni hụn wịrịnị mọbụ hụn rụnị.
9
Wẹ ile rịchanrịn mma, ẹnya ndị nwọn uche; onwọnni hụn nwọn ntụpọ ẹnya ndị marịn ihiẹn.
10
Weri nkuzi m hụn nkẹ y'e gi weri siliva, weri ịmarịn-ihiẹn hụn nkẹ y'e gi weri ezigbo goru.
11
Makẹni amamihiẹn ka mkpa a rị karị rubi nwẹnẹ goru, onwọnni ihiẹn ọwụlẹ a sụọnị wẹ gi e jen'ẹ.
12
Mmẹ wụ amamihiẹn lẹ uche bi ụzọ ohu; ịmarịn-ihiẹn lẹ akọ-lẹ-uche rị m ẹka.
13
Ịtụ-egun Osolobuẹ wụ ize-ize eje-ihiẹn; ize mpache lẹ nhọnrọn e ze m e ze, uwẹ lẹ eje-omumẹ lẹ oku rụnị.
14
Ndụnmọdụn rị mma lẹ ezigbo akọ-lẹ-uche wụ nke m, mmẹ nwọnzi nghọta lẹ ikẹn.
15
Mmẹ kẹ ndị-nze gi a kị, ndị a kịnị gizikwọ m e ye ezigbo iwu;
16
mmẹ kẹ ndị-ọkịkị gi a kị, uwẹ lẹ ndị-isi lẹ ndị-ndu ile a kị k'o furu.
17
Ndị ihiẹn m a sụọ, ihiẹn wẹ a sụọ m asụọ; ndị hụn a chọshi m ikẹn a hụn m a hụn.
18
Ẹka m kẹ ẹfe (akụ-lẹ-ụba) lẹ ọghọ rị, akụ-lẹ-ụba hụn a tọnị lẹ ezi-omumẹ.
19
Ihiẹn m'e ye ka ezigbo goru; mkpụrụ m'a mịpụha ka ezigbo siliva.
20
Ụzọ rị mma kẹ m'a gha, ụzọ furu efuru,
21
m hụ e mẹ ndị ihiẹn m a sụọ e nwọnrin akụ-lẹ-ụba, e kpọn ihiẹn e junni wẹ ebe wẹ e butọ ihiẹn.
22
Mmẹ kẹ Osolobuẹ wepụha ihun nọkẹ ọrụn ibuzọ a, n'o d'a rụnma ihiẹn ndị ọ rụn isi ibuzọ.
23
O tumẹ m ẹdẹi, isi mbidọn, ogẹn ụwa kelẹni bidọn.
24
Kẹ okẹn-ohimin kelẹni rị, ya kẹ wẹ mụ m, kẹ isi-mirin ichẹn-ichẹn mirin gha a pụha kelẹni rị;
25
nị wẹ d'e dọnmẹsọnmẹ ugu ọnọdị wẹ, kẹ òke ichẹn-ichẹn kelẹni rị — a mụọlẹ wẹ m;
26
n'o d'e ke alị lẹ ọfịa ndị rịn'a mọbụ ẹjan ọwụlẹ rị elu-ụwa.
27
M hụ ebahụn ogẹn o gi dọnmẹ igwere ọnọdị, ogẹn o gi tumẹni ohimin lẹ igwere okẹn;
28
ogẹn o gi tumẹ orukpu rịsọnmẹ elu, ogẹn isi-mirin rịsọnmẹni gi kẹnrẹn,
29
ogẹn o gi tini mirin ohimin iwu, amamgbe mirin a ghafe ebe o ku; ogẹn o gi tumẹ ụwa iyetọ a.
30
Mmẹ wụ ọkaa hụn o gi mẹmẹ wẹ, hụn e mẹ ẹfọ a sụọ a ụsụọ ụhụọhịn-ụhụọhịn, a nọ ihun ẹ a ghọghọ ogẹn ile —
31
e gi ufiri ụwa o ke a ghọghọ, ẹfọ hụ e gi ufiri ịhịan o ke a sụọ m ụsụọ.
32
Gọn ni m nwan ntịn, ụmụ m! Gọnni m ntịn; n'ọ bọnị ndị e sọnsọnmẹ ụzọ m ọda-ọda.
33
Weri ni ndụnmọdụn m kẹni ụnụ nwọnrin uche; alatọkwọlẹ n'a.
34
O jẹnkọ d'a rịnị onyẹ hụn e gọn m ntịn mma, onyẹ hụn e che m ọnụ-mgbọn iwe m ụhụọhịn-ụhụọhịn n'ọ hụn m, e rudẹ ọnụmụzọ iwe m d'e che m.
35
Makẹni onyẹ nwọnhẹn m, o nwọnhẹn ndụn, ihiẹn ẹ a sụọma Osolobuẹ.
36
Kanị onyẹ ọwụlẹ nwọnhẹnlẹni m rị a rụ enwẹn ẹ ẹhụ; ndị ile ize m e ze, ọnwụn rị a sụọ wẹ a sụọ.”
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc
:
Save Notes