O chɛ ka binshɛɣukam mali di saha; ka din pahi nyɛla, o chɛ ka ti mi din pun niŋ, din saha gari mini din na yɛn niŋ dahin’ shɛli ha yɛla. Amaa ka ti lee ku tooi baŋ ŋun’ Naawuni ni pun niŋ shɛm kurimbuni ha ni o ni yɛn niŋ shɛm di bahigu ni.
M mi ni Naawuni ni tum shɛlikam kul ni beni sahakam. So ku tooi zaŋ shɛli pahi di ni bee n-yihi shɛli di ni. Naawuni n-tum lala ni di chɛ ka sokam zaa zo o.
Din pahi nyɛla dunia ŋɔ ni, n nyaya ka zaligu dolibu ni be shɛli ninvuɣ’ biɛtali bela nimaani; ka lan nya ka wuntitali ni be shɛli ninvuɣ’ biɛtali lan bela nimaani gba.
Dama din yɛn niŋ ninsalinima, dina n-yɛn niŋ biŋkɔbiri gba. Ninsalinim’ kpirimi ka biŋkɔbiri gba kpira. Vuhim yini ka bɛ zaa mali. Ka ninsal’ bi so biŋkɔbigu. Dimbɔŋɔ zaa nyɛla din ka buchi.
Dinzuɣu n nyaya ka binshɛli kani n-so m-pahila di simdi ni ninsalinim’ mini biŋkɔbiri zaa di bɛ tuma nyɔri, bɛ tarili m-bala. Dama ŋuni n-lee ni ti tooi zaŋ ba labisina ka bɛ ti nya din yɛn be bɛ kalinsi nyaaŋa?