Igintalaan niya an angay nga panahon han ngatanan nga mga butang. Gintagan kita niya hin ungara hin paghibaro han kabubwason, kundi diri gud niya ihinahatag ha aton an kalipay hin pakasayod gud han iya ginbubuhat.
Maaram ako nga magpapadayon gud an ngatanan nga ginbubuhat han Dyos. Diri ka makakadugang o makakaiban hin bisan ano hini. Usa nga butang nga karuyag han Dyos amo nga tumahod kita ha iya.
Nagsiring ako ha akon ngahaw, “Waray pinalabi an paghukom han Dyos han mga magtadong ngan han mga magraot, kay mahinanabo man ha igintalaan nga panahon an ngatanan nga butang ngan ngatanan nga buhat.”
Ngani, waray kalainan an kapalaran nga naghuhulat han tawo ngan han mananap. Napatay an tawo sugad han mananap, kay hira nga duha mga binuhat. Diri labaw han mananap an tawo, kay waray la kahulogan ha ira nga duha an kinabuhi.
Sanglit nakasabot ako nga an maupay nga sadang naton buhaton amo an pagpahimulos han aton ginkabudlayan. Waray na iba nga aton mabubuhat. Waray paagi para ha aton hin pakasabot kon ano an mahinanabo ha aton katapos ta kamatay.