Bejimat lebuh nuan mansang ngagai Rumah Sembiang. Manah agi nuan kin mai ati ti keran deka belajar, ari ti keran deka ngenjuk piring baka orang ke beli, ti enda nemu bida entara utai ti ngena enggau utai ti salah.
Berunding dulu sebedau nuan mansutka jaku, lalu anang enda berunding enggau manah sebedau nuan ngaga semaya enggau Allah Taala. Iya di serega din, lalu nuan di dunya ditu. Nya alai, anang nyebut utai lebih ari ti patut.
Nya alai, lebuh nuan ngaga semaya enggau Allah Taala, nuan enda tau enda enggau naka pengelengkas ngamatka semaya nya. Allah Taala enda begunaka orang ke beli. Kereja aja utai ti disemaya nuan.
Nuan nyangka suah bemimpi, nyangka ngereja mayuh bengkah pengawa ti nadai guna, tauka kutap-kutap bejaku, tang nuan enda tau enda mengkang nangika Allah Taala.
Anang tekenyit ati lebuh nuan meda perintah nekanka pengidup orang ke seranta, lalu enggai meri sida atur ti lurus, sereta enggai meri sida hak ti endang enggi sida. Genap iku pemesai endang dijaga siku orang ke tinggi agi pangkat ari iya, lalu seduai iya pen sama mega dijaga pemesai ti tinggi agi pangkat ari seduai iya.
Enti nuan angkunka duit, nuan enda nemu puas ati. Enti nuan ingin deka kaya, nuan enda ulih ngulihka semua utai ti dikinginka nuan. Utai nya nadai guna.
Bala orang ke gawa nyangka chukup tauka enda chukup utai diempa, tang sida tentu ulih tinduk jenak lebuh malam hari. Tang orang ke kaya sigi amat mayuh reta, datai ke sida nyau enda ulih tinduk laban sida irau ati.
Tu utai ti udah ditemu aku: utai ti pemadu manah, ti tau dikereja kitai nya makai, ngirup lalu ngelantangka diri ngena utai ti udah ulih kitai dalam umur ti pandak tu, ti diberi Allah Taala ngagai kitai. Tu endang ungkup kitai.
Enti Allah Taala meri kitai pengaya enggau reta tengkira, lalu nejuka kitai ngelantangka diri, kitai patut beterima kasih, lalu ngelantangka diri ngena utai ti udah ulih kitai, laban utai nya endang pemeri ari Allah Taala.