Riip keeldong'ung' ye iwendi kootap Kamuktaindet; amu kaigai keriikyi si kegas, kosiir koroseek che igoitoi piik che perber; amu ma naei icheek kole yaei yaityet.
Amat kosartae kuting'ung' ak amat kosartae muguleldang'ung' komwa kiy age tugul eng' taitap Kamuktaindet, amu mi Kamuktaindet ne Toroor kipsengwet ak imi ng'wony. Ingong'ering'itu anyun ng'aleeguk.
Ngot igeer kesastae kibananiat ak keistoi kirwooget ak imanda eng' koroomnateet eng' emet, ko mekwong'ee nooto. Amu keerei nooto ineendet ne toroor kosiir icheeget che torooreen, ak mi che torooreen kosiir icheek.
Ogeero, kiit ne myee ne ki ageer ak ko nyolu, ko koamis chii ak koe, ak kobaibaitune tuguuk che myach eng' poisyennyi tugul ne yaei eng' kurereetap asiista, eng' peetuusyek tugul che po sabeennyi che ki igoochi `Kamuktaindet ineendet. Amu kebebertanyi niito.
Ak chii age tugul agine ne ki igoochi Kamuktaindet mogornatosyek ak chaang'indap tuguuk, ak kogoochi kimnateet ne ame tuguuchooto, koip kebebertanyi, ak kobaibaitune poisyennyi; niito anyun ko konunetap Kamuktaindet.