×

Ika Bible 2018

Solomọnụ 3

1
Eki e we fọn, m hụ elu bẹdi m, a chọ Nke-m; a chọ m'a, ahụnnị m'a.
2
M nọ sị, “M k'e lihi nwan d'a chọhunmẹmẹ ẹ imẹ obodo, ọgbara-ogbe lẹ ebe ịhịan ile a gha; m k'a chọ onyẹ ahụn a sụọ obi m ụsụọ.” Ya m nọ chọ a, ahụnnị m'a.
3
Ndị-nche a hụn m ebe wẹ rị a ghahunmẹ imẹ obodo. M nọ sị wẹ, “Ụnụ a hụnghọ onyẹ ahụn a sụọ obi m ụsụọ?”
4
A ghafegụ m wẹ hụ ẹkẹrẹ, m nọ hụn onyẹ a sụọ obi m ụsụọ. M nọ kwọndọn ẹ, jụ n'a hatukọ m'a — d'e ru n'e wẹhẹgụ m'a iwe nnẹ m, mmughẹ onyẹ hụn bu m ẹfọ.
5
Ịgbagba Jerusalẹm, ma isi mgbadan lẹ ele, akpasukwọlẹ ni mọbụ kpọtiẹn ihiẹn-ọsụsụọ d'e ru mgbe ọ sụọ a.
6
Onyẹ wụ hụnnị gha alị ọkpọ-nkụn lala, nọkẹ ebe ẹnwụnrụn rị a lọ? Onyẹ wụ hụnnị rị e kun fuẹin yeni udẹn maa lẹ nsẹnsi ọ kwọ — hụn wẹ gi ihiẹn ile e kun fuẹin rị afịa mẹmẹ?
7
Lee ẹnya! Ụgbọ-ẹshin Solomọnụ rọ; odogun-agha ọgụn-ẹtọ dula a — odogun-agha kachanrịnnị imẹ Izrẹlụ;
8
wẹ ile bu ọpịa-agha, ndị-agha wẹ zụn kẹ wẹ ile wụ; onyẹ-onyẹ bu ọpịa-agha a ukun, makẹ ihiẹn-egun uhinhin.
9
Eze wụ Solomọnụ lẹ enwẹn ẹ rụn ụgbọ-ẹshin hụ, ezigbo osisi alị Lẹbanọnụ kẹ o gi rụn a.
10
Siliva k'o gi mẹmẹ ẹgbe ndị o tumẹ imẹ ẹ, gi goru mẹmẹ alị a. Ẹkwa pọpụ ṅanrannị kẹ wẹ gi fụma oche ẹ; a chọ wẹ imẹ ẹ mma hụn a la ẹnya — ịgbagba Jerusalẹm mẹ ọhụn.
11
Ịgbagba Zayọnụ, pụha nị-o! D'e lee ni Eze Solomọnụ lẹ okpu-eze hụn nnẹ ẹ kpumẹ ẹ ụhụọhịn ọ gba ẹhụhụọ, ụhụọhịn obi sụọ a ụsụọ!!
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc
:
Save Notes