Ụgb'ọnụ ị e nwun ufie-ufie kẹ eriri-ẹkwa ufie; ọnụ ị a maka mma. Nti i ẹbụbụọ rị a chan pọị kẹ imẹ gova-pomegraneti wẹ wabe — imẹ ẹkwa hụ i gi kpumẹ ihun.
Y'e werigụọ obi m, nwẹnẹ m, nwunyẹ m; y'e werigụọ obi m — ẹnya hụn i lee m hụ k'i gi weri akpobi m, akpụ ihiẹn-olu ohu imẹ hụn i yi k'i gi weri akpobi m.
Ihiẹn-ọsụsụọ ị a sụọka m, nwẹnẹ m, nwunyẹ m! Ihiẹn-ọsụsụọ ị sụọnahịn manya ọhụnma-ọhụnma; udẹn i kunnahịn ihiẹn ile e kun fuẹin — kunnahịn wẹ ọhụnma-ọhụnma!
Nwunyẹ m, ụgb'ọnụ ị a sụọka ụsụọ; ọ sụọ kẹ mirin-obobo; ọ hụ a tan kẹ ọgba mirin-ẹnwụn dọn a tan mirin-ẹnwụn. Mirin-ẹran lẹ mirin-ẹnwụn rị ị okpuru ire. Ẹwuru i rị e kun fuẹin kẹ alị Lẹbanọnụ.
Ufere ẹbamịn-ugu, tẹnhin! Ufere ẹbamịn-ndịdan, fehẹzịkwọ! D'e fe ugbo-obobo m, kẹni o kungbarị. Nke-m ya banhan nwan ugbo-obobo ẹ d'e ri ezigbo mkpụrụ ọ mị.