Kua tae mai ahau ki tāku kāri, e tōku tuahine, e tōku hoa; kua oti tāku maira me tāku kīnaki kakara te kohi, kua kainga e ahau tāku honikoma me tāku honi; kua inumia e ahau tāku wāina me tāku waiū. E kai, e ōku hoa; e inu, inā, kia nui te inu, e tāku e aroha nei.
I te moe ahau, ko tōku ngākau ia i te oho. Ko te reo tēnei o tāku e aroha nei e pātuki ana, e mea ana, “Te tatau ki ahau, e tōku tuahine, e tōku hoa, e tāku kūkupa, e tāku mea pokekore; kī tonu hoki tōku māhunga i te tōmairangi, ōku makawe anō hoki i ngā kōpata o te pō.”
I ara atu ahau ki te uaki i te tatau ki tāku i aroha ai; māturuturu ana te maira i ōku ringa, te maira waiwai i ōku maihao ki ngā puritanga o te tūtaki.
Uakina ana e ahau ki tāku i aroha ai; heoi kua maunu atu tāku i aroha ai, ā, kua riro. Tōku wairua riro pū i tāna kupu. I rapu ahau i a ia, heoi kīhai i kitea; i karangatia atu ia e ahau, kīhai anō ia i whakahoki kupu mai.
I tūtaki ki ahau ngā kaitiaki e kōpikopiko nei i te pā; patua ana ahau e rātou, mamae ana ahau i a rātou; tangohia ana tōku hīpoki i ahau e ngā kaitiaki o ngā taiepa.
E te wahine ātaahua rawa o ngā wāhine, he aha te nuinga ake o tāu i aroha ai i tētahi atu e arohaina ana? He aha te nuinga ake o tāu i aroha ai i tētahi atu e arohaina ana, i pēnā ai tāu kī mai ki a mātou?
Ko ōna pāpāringa, ānō he tupuranga kīnaki kakara, ānō he rārangi tarutaru reka. Ko ōna ngutu, me te mea he rengarenga e whakamāturu iho ana i te wai maira.
Ko ōna waewae, rite tonu ki te pou mapere, he mea whakatū ki ngā tūranga kōura pai rawa. Ko tōna āhua koia anō kei Repanōna, me te hīta te tino pai rawa.