Alị ụnụ a gbagụọ okpokoro; a dụngụọ wẹ obodo ụnụ rị ichẹn-ichẹn ọkụn; abịamabịa hụ e wiwi ugbo ụnụ idẹnya ụnụ, e mẹ wẹ a la iwi rịkẹ ebe itumunyẹ nọ weri ọkịkị.
“Ẹjan hụ ile ụnụ a chụnyeni m, kịnị kẹ m gi wẹ e mẹ?” Ya kẹ Osolobuẹ ku. Ẹjan w'a kpọ ọkụn a gbụgụọ m, kẹ hụn wẹ gi mmụ ebulu chụn kẹ ụtọrọ anụ ndị wẹ zụntọsọnmẹ; ẹdeke okẹn-efin lẹ ebulu lẹ ewu ara sụọ m.
Wẹhẹbehi ni ni m oyiye nwọnlẹni-isi! Nsẹnsi ụnụ a rụgụọdẹ ẹnya m. Kẹ Mmẹmmẹ Ifọn-ọhụn ụnụ kẹ Ụhụọhịn Ezumikẹn ichẹn-ichẹn ụnụ gi e fe m kẹ Ozuzu ofufe ichẹn-ichẹn ụnụ, Asa m ẹka dinzi: e mẹ njọ e zuzi ozuzu-nsọ ndịnị!!
Mụnị kẹ wẹ dọn e mẹ ihiẹn rị mma! A kwadọn ni ezigbo eṅẹn, e yeni ni ndị wẹ rị e mẹgbu ẹka. A nọ nị ndị nwọnlẹni nẹdi e ye azụụn, e kinni ni ikpoho di wẹ nwụn ọnụ wẹ.
Ndị-ọkịkị ị wụ ndị nnupụ-isi, uwẹ lẹ ndị ohin gba a wị; egho-azụụn a sụọ wẹ ile a sụọ; w'a chọsọnmẹ onyẹ k'e ye wẹ ihiẹn. W'a ra kuni ndị nwọnlẹni nẹdi ọnụ wẹ; w'a ra buchedẹ ẹnya oku ikpoho di wẹ nwụn.
E yezi m'i ezigbo ndị-ndu nọkẹ hụn m ye i ogẹn mbụ, yezi i ezigbo ịhaịmẹ nọkẹ ndị hụn m ye i isi mbidọn. Omẹgụ, wẹ k'a kpọmazị ị ‘Obodo Ezi-omumẹ, Obodo wẹ gi e dọn ẹnya.’ ”