ka aria airazingohe ku bani pati sarangbanga, ka dia gu rurupai nga ga gimi rungorungo aboro ku sa yo, ya adekurugbo ki du ni gayo gbugbu ahe, i ki sa awirinyaure ni gayo zizi ahe!
Ono gini pai oni ka manga ti uru fu mbusa, na ti rago gu gbarasahe nikaye gii ngbi yo? Da oni ka ora koyo du ni ni tipa undahe? Na wari oni ka mbu gaoni taarimo ni?
Oni agbura kina ku sande dagba zizi aboro yo, watadu tiwa kina ku dagba kangba aboro yo. Ono mbiko agi apai dunduko re ga Yekova zinga aguari nga ku sa yo te ono beko ni taĩtaĩ he kindi.
Mi nakeda yo kuti gu rikaaboro nga airabiriki, mi nafu ndika fu yo kuti agu aboro mi nazinga fu yo, ka roga gbugbuahe, na ziziahe a, na ka simba yo ku sande wa fuka ngba agene bakporo
Ho Yekova ka nyasa gako sunge ni dunduko ku ri Bagangara Siona na ku ri Yerusarema, ko ambúsa gu nyaka ngbaduse nga ga bakindo aAsuro, na gu taarimo nga ga gako ruka
Bambiko ya ko: “Mi mangi gere ni gu ome nga ga bere, na be gi tatamana, mbiko mi du na rugatinapai; mi gbisi agu abangbandarago nga ga aboro, ki rogo gayo kikipaahe be yo; wa du mi ni ngangarã boro mi zorõsi agu yo sungu auru ambatabakindo
Mi bi agu aukumuko nga ga aboro wa bi bambu zire; wa ka boro adungura agu apara azire mbu ami he, wo dungura mi kpotosende dunduko; a nga gu ru sa nawo ti puporu te, watadu gu ru sa nazara gutu ngbaru te, watadu gu ru sa napaa a te.”
Ka mangua abia tiru fu gu ni nade he na u? watadu mará gba ngua taasi tihe fu gu ni namanga sunge na ni? Si wa ka ngbondo zigizo agu yo tumba ha ku an, watadu wa ka ngau tumba gu ni ku ari angia nga ngua ya!
Ti gu rago re gu yangara awiri aYisaraere na agu yo nabati dagba ngbatunga Yakoba yo, i akida nga berewe kuti gu ni nanataka yo te, ono i akida kina kuti ndikidi Yekova sa, nga ga Yisaraere Ziazia ko.
Bambiko ka gamo aboro aYisaraere vura du wa ngume baime vurũ, kina yangara yo gbua níkakaraga tiyo. Ringbisa pa nyasa aboro du, ki du na rurupai kpaima.
Si du ya Gbia ti ni were, nga Yekova nga ga arimbasa ko: “Ako gimi aboro naraka Siona yo, ka oni gunde nga be aAsuro ya ka i vura ta roni ni ngbondo mará vurũ ki tumba gayo ngau kuti roni wa aEzipeto amangi he
Yekova nga ga arimbasa ko ki di kpoto dupo kuti yo, wa rago gu imo aboro nga ga aMidiano pati gu mbia nga Orebe; gako ngbondo adu ri baime, ko atumba ha ku an oerewe wa gu ko amangi he Ezipeta yo.
Mo ngére, Gbia nga Yekova nga ga arimbasa ko, ko adéwa gu be angua ku sa yo ni gbudagbuda; ono gu bagbangagbanga ngua giza basona ha gbe ko adéwa ha adewa ku sande, ko adéwa gu bagbangagbanga ha ku sande