×

現代台語譯本羅馬字版

以賽亞書 11

1
Tùi Iâ-se ê lāu chhiū-thâu ōe puh-íⁿ, tùi i ê kun ōe hoat iù-ki.
2
Siōng Chú ê sîn beh kap i tông-chāi, chiū-sī hō͘ i ū tì-hūi kap chhong-bêng ê sîn, ū kè-ōe kap lêng-le̍k ê sîn, ū tì-sek kap kèng-ùi Siōng Chú ê sîn.
3
Kèng-ùi Siōng Chú sī i só͘ ì-ài. I bōe chiàu ba̍k-chiu só͘ khòaⁿ lâi sím-phòaⁿ, mā bōe khò hī-khang só͘ thiaⁿ lâi phòaⁿ-toàn.
4
I beh ēng kong-gī ûi-hō͘ sàn-chhiah-lâng, ēng kong-pêng pó-chiong hō͘ lâng khòaⁿ-bô-khí ê lâng. I beh ēng kong-chèng ê chhâi-koat chòe kùn kòng pek-hāi-chiá, hoat bēng-lēng chhú-sí siâ-ok ê lâng.
5
I beh ēng kong-gī tī-lí, ēng sìn-si̍t thóng-tī.
6
Chhâi-lông kap mî-iûⁿ ōe chòe-hé tòa; pà kap soaⁿ-iûⁿ-á-kiáⁿ chòe-hé khùn. Gû-á-kiáⁿ kap sai-á-kiáⁿ tàu-tīn chia̍h; sòe-hàn gín-á ōe chòe bo̍k-chiá khòaⁿ-kò͘ in.
7
Gû-bú kap hîm-bú ōe chòe-hé chia̍h; in ê kiáⁿ ōe chòe-tīn hioh-khùn. Sai ōe chhin-chhiūⁿ gû chia̍h-chháu.
8
Chia̍h-lin ê eⁿ-á ōe tī to̍k-chôa ê khang-kháu thit-thô; tn̄g-lin ê gín-á ōe chhun-chhiú ji̍p-khì to̍k-chôa ê hia̍t.
9
Tī góa sèng-soaⁿ ê ta̍k só͘-chāi, it-tēng bô siong-hāi, mā bô phò-hoāi; in-ūi tùi Siōng Chú ê jīm-sek phó͘-ki̍p choân-tōe, chhin-chhiūⁿ chúi chhiong-móa tōa-hái.
10
Tī hit-ji̍t, Iâ-se ê kun ōe chiâⁿ-chòe bān-bîn ê tōa-kî khiā-chāi-chāi. Bān-kok lóng ōe ióng-hō͘ i. I khiā-khí ê só͘-chāi ōe chhiong-móa êng-kng chhàn-lān.
11
Hit-sî, Chú ōe tē-jī piàn chhun-chhiú tùi A-su̍t, Ai-ki̍p, Pa-te̍k-lô, I-soh-phit-a, Í-lân, Pa-pí-lûn, Hap-má, í-ki̍p iân-hái tōe-khu sio̍k-hôe só͘ chhun ê chú-bîn tò-tńg--lâi.
12
Chú ōe ǹg bān-kok chhāi tōa-kî, tùi tōe ê sì-hng chū-chi̍p sì-sòaⁿ ê Í-sek-lia̍t -lâng óa--lâi, chiong siū kóaⁿ-sòaⁿ ê Iû-tāi jîn-bîn chū-chi̍p tò-tńg--lâi.
13
Hit-sî, Í-sek-lia̍t ê oàn-tò͘ ōe siau-sit, Iû-tāi ê te̍k-sī mā ōe soah; Í-sek-lia̍t bōe koh oàn-tò͘ Iû-tāi, Iû-tāi mā bōe koh te̍k-sī Í-sek-lia̍t.
14
In ōe tàu-tīn chhiong lo̍h-lâi kong-kek sai-pêng ê Hui-lī-sū, chhiúⁿ-toa̍t tang-pêng ê jîn-bîn. In ōe cheng-ho̍k Í-tong kap Mô͘-ap ê jîn-bîn; A-bûn -lâng ōe khut-ho̍k tī in kha-ē.
15
Siōng Chú ōe hō͘ Ai-ki̍p ê hái-oan ta-khok-khok; I ōe gia̍h-koân I ê chhiú tōa la̍t ia̍t sio-hong, hō͘ Iù-hoat-la-tí-hô pìⁿ-chòe chhit tiâu ta-khoe, lâng chhēng chháu-ôe mā ōe-tàng kiâⁿ--kè.
16
Beh ū chi̍t tiâu tōa-lō͘ ūi-tio̍h Siōng Chú só͘ chhun ê chú-bîn pī-pān, thang hō͘ in tùi A-su̍t tô-thoat--chhut-lâi, chhin-chhiūⁿ kó͘-chá Í-sek-lia̍t -lâng tùi Ai-ki̍p -tōe chhut--lâi siâng-khoán.
Chinese TTVR
The Bible Society in Taiwan
:
保存笔记