×

RUAC KUƆTH IN RƐL RƆ 1998

I-ca-yaa 11

1
Bi kaar tunh puɔ̱ɔ̱ny jiaath, bi kuäär ben dhɔr Jɛthi.
2
Kä bi yiëë Kuɔth Nhial nyuur kä jɛ, yiëë pɛlä kɛnɛ ŋäc ŋɔaani, yiëë mi nyuuth jɛ kä moc jɛ buɔ̱m, yiëë mi bi jɛ ŋi̱eec kä bi jɛ moc luth Kuɔth Nhial.
3
Kä bi lɔcdɛ tɛɛth kɛ luth Kuɔth Nhial. Kä /cɛ naath bi luk kɛ min cɛ nɛn kɛ wäŋkɛ, kiɛ min cɛ liŋ kɛ ji̱thkɛ.
4
Duundɛ ɣöö bɛ can luk kɛ cuŋ, kä bɛ ga̱y ɣɔaa luk kɛ thuɔ̱k, kä bɛ wi̱c muɔ̱ɔ̱n duäc kɛ ruacdɛ, kä bɛ ji̱ nyuɔɔni näk kɛ yiëë thuɔkdɛ.
5
Kä cuŋ kɛnɛ thuɔ̱ɔ̱k tek kɛ jɛ ni ciaŋ.
6
Bi jio̱k nyapëc cieŋ kɛɛl kɛnɛ ruath dɛ̈ɛ̈l, kä bi kuac tɔ̱ɔ̱c kɛɛl kɛnɛ dɔw böwä, kä bi dɛy ɣɔ̱ɔ̱k laak kɛɛl kɛ dɛy luɔny, kä bakɛ buɔth ɛ gat mi tɔt.
7
Bi ɣɔ̱k laak kɛɛl kɛ lɛt, kä bi dɛykiɛn tɔ̱ɔ̱c kɛɛl, kä bi lony laak kɛ wal ce̱tkɛ yaŋ.
8
Kä bi gat mi lueth ŋar gekä dɛŋciɛkä, kä bi gat mi döth tetdɛ la̱th ɣo̱t lualdi̱tdä.
9
Kä cikɛ bi tekɛ riɛk kiɛ da̱k wi̱i̱ pa̱a̱mdä min rɛl rɔ, bi wi̱c muɔ̱ɔ̱n thia̱a̱ŋ kɛ ŋäc ŋɔaani Kuɔth Nhial ce̱tkɛ min la pi̱w yier a thiääŋ.
10
Ɛn cäŋ ɛmɔ bi kuäär mi pay tuɔɔk ben dhɔr Jɛthi mi bia̱ nyuuth kä naath, kä bi döör diaal rɔ̱ duɔ̱l jɛ, kä bi gua̱a̱th cieŋädɛ thia̱a̱ŋ kɛ gɔɔy.
11
Ɛn cäŋ ɛmɔ bi Kuäär ni Kuoth rɔ nyɔk kɛ mi no̱o̱ŋɛ duɔth nɛɛnikɛ tin ŋot kɛ tëk kä A-thi-ri-ya kɛnɛ cam I-jëp kɛ cuec I-jëp kɛ Kuc kɛnɛ Ee-lam kɛ Ci-nar kɛnɛ Ä-math kɛ dhuɔ̱li baar.
12
Kä bɛ nyuuth jiɛc kɛ kui̱ dööri, kä bɛ pɛ̈ɛ̈c I-thɛ-rɛl rol, kä bɛ ji̱ Juda tin däk piny ma̱a̱t tuɔ̱ŋni ɣɔaa da̱ŋ ŋuaan.
13
Bi tiɛɛl I-thɛ-rɛl thuɔ̱k, kä ba gak ji̱ Juda woc. /Ci I-thɛ-rɛl bi lɛ te tiɛɛl kɛ Juda, kä /ci Juda bi lɛ gaak kɛ I-thɛ-rɛl.
14
Bikɛ ji̱ Pi-li-thɛt mak kui̱c konyä ca̱ŋ, kɛɛl bikɛ ji̱ kuec känyä ca̱ŋ pɛc. Kä bikɛ Ɛ-dɔm kɛnɛ Mo-ab pɛc, kä bakɛ luɔ̱th ɛ ji̱ Am-on.
15
Bi Kuoth Nhial pi̱ baar I-jëp jak kä kööt, kä bɛ tetdɛ yi̱th wi̱i̱ Kiɛɛr Yu-pɛ-ree-tidh, kɛ jiɔam mi leth, kä bɛ jɛ dääk kä löli da̱ŋ bärɔw, kɛ ɣöö bi naath jɛ ŋok ko̱o̱tdä.
16
Bɛ tekɛ duɔ̱ɔ̱p mi di̱i̱t kɛ kui̱ duɔthni nɛɛnikɛ kä A-thi-ri-ya, ce̱tkɛ mëë bä ji̱ I-thɛ-rɛl raar kä I-jëp.
Nuer Bible 1998
Nuer Bible Bible Society in South Sudan 1998, 2012
:
Tɔ̱a̱w Notethni̱