तू एक बुरा सासक रह्या, अउर अब तोहार अन्त भवा ह। हिआँ तलक की चीड़ क बृच्छ भी सुस्त अहँइ। लबानोन मँ देवदार का बृच्छ भगन अहइँ। बृच्छ इ कहत हीं, “जउन राजा हमका गिराए रहा। आजु उ राजा क हीं पतन होइ ग अहइ, अउर अब उ राजा कबहुँ खड़ा नाहीं होइ।”
तू हमेसा आपन स कहत रह्या, “मइँ अकासन पइ आरोहण करब अउर परमेस्सर क तारन क ऊपर अपना सिंहासन कायम करब अउर देवी पर्व जप्पा क चोटी पइ बैठब, जहाँ पइ जप्पा क सबन त ऊँची चोटीयन पइ देवतन अकत्र होत ह।
बहोत स अउर भी राजा लोग मरेन। ओनके लगे आपन-आपन कब्र अहइँ। किन्तु तू ओनमाँ नाहीं मिलब्या। काहेकि तू आपन ही देस क बिनास किह्या। आपन ही लोगन क तू बध किहा ह। जइसा बिनास तू मचाए रह्या।
ओकरी सन्तानन क बध तइयारी करा। तू ओनका मउत क घाट उतारा काहेकि ओनकर पिता अपराधी अहइ। अब कबहुँ ओकरे पूत नाहीं होइहीं। ओकर सन्तानन अब कबहुँ भी संसार क आपन नगरन स नाहीं भरिहीं। तोहार सन्तानन वइसा करत नाहीं रहिहीं। तोहरी सन्तानन क वइसा करइ स रोक दीन्ह जाइ।
सर्वसक्तिमान यहोवा एक बचन दिहे रहा। यहोवा कहे रहा, “मइँ बचन देत हउँ, कि इ सबइ बातन ठीक वइसे ही घटिहीं, जइसे मइँ एनका सोचेउँ ह। इ सबइ बातन ठीक वइसे ही घटिहीं जइसे कि मोर योजना अहइ।
हे, पलिस्तियो क प्रदेसो! तू बहोत खुस अहा काहेकि जउन राजा तोहका मार लगावा करत रहा, आजु मर चुका अहइ। किन्तु तोहका असलियत मँ खुस नाहीं होइ चाही। इ फुरइ अहइ कि ओकरे सासन क अंत होइ चुका अहइ। किन्तु उ राजा क पूत अबहिं आइके राज करी अउ उ एक अइसे साँप क समान होइ जउन खउफनाक नागन क जन्म दिया करत ह। इ नवा राजा तू लोगन बरे एक ठु बड़के फुर्तीले खउफनाक नाग क जइसा होइ।
हे नगर दुआर क बासियो, रोवा! नगर मँ बसइयो तू लोग, चीखा-चिल्ला! पलिस्ती क तू सब लोगो डेराइ जाब्या। तोहार हिम्मत गरम मोम क नाई टेघरिके ढल जाइ। उत्तर दिसा कइँती लखा! हुवाँ धूरि क एक बादर अहइ। लखा, अस्सूर स एक फउज आवति अहइ। उ फउज क सबहिं लोग बलवान अहइँ।