Abeipa ta Zakaw ngiachhiepa ta, Izarei a tlyh heih aw ta, ama râh tlai liata a paysa heih aw ei. Chihropazy ta âmo cha a bai aw ei ta, Zakaw pathlazy cha amâ pazao aw.
Phopizy ta Izarei pathlazy cha a chhipa ta, ama y nawpa su tlôkhei aw ei ta, Izarei pathlazy ta âmo cha seichapawzy nata seichanôzy ta Abeipa râh liata ama hnei aw. Sei ta âmo a vaw patu tyhpazy kha, Izarei pathlazy ta sei ta patu aw ei ta, âmo a vaw tlybai tyhpazy chô liata ryu ama reih aw.
Chatawhcha hetana heta a vaw châ aw. Nama pachârôhna, namâ tymâna nata rai ru ngaitapa ama cha pahriasapa zy tawhta apahâna Abeipa ta a cha pie ti ei ta,
Pathi iapa ta a chalih beih leipa ta phopizy tu ta, Taolana chhâ thai khao leipa ta ryureih ta, Râhzy chô liata hiehâhpa ta ryu a reihpa Chôchahrei cha a thlie haw.
Na tlô tita cha vaw dy awpa ta, Ry lâ Athihkhih ta a patohpatia ta; Châ naoh awpa ta, Lei beizy thlahpa zydua pahra ta, Râh to bei zydua cha, Ama beidyuchhai tawhta a pathyu ei.
Nâ papiparysana kha Athihkhih lâ sie ha ta, Na totâ pyu chhao Athihkhih lâ a sie haw. A ry lâta na hmohphaw châta, Alôpazy phawpa châ ta; A chô lâta nâ bu awpa ta, Châkariepazy sopa a châ.
Na palôh liata, ‘Avâ lâ kiah aw na ta, Khazohpa awhsizy chô lâ liata Vâ chô sâhpa liata ei beidyuchhai patyu aw na ta, Maw chhâna pakhypi tlâh liata ei tyuh aw.
Nâ deikua cha tho chiah raohpa ama thypa hawhta, Na thlâ tawhta lâhlapi lâta thypa na châ. Zaozi ta a chô pahliepa athihpazy cha poh ta a bu chi ta, Alô khaohtlô liata thypa na châ; Athihpa rizy ta ama phei ta ama cha tlypâ.
Âmo pathlatuhpa moleina vâta, A sawchapawzy thie nawpa su a chhuahdy teh u; Chataleipatala thyu aw ei ta, Khizaw he hnei aw ei ta, Alei chô he khihpizy ta ama pabie pathlei aw na.’”
“Thyuhnao aw ei na ta, Babylaw cha a moh phie aw na ta, A laibâhpazy ei chhawh pathlah khai aw; A chhôhchhi nata a chipathlazy Ei chhawh pathlah khai aw ei,” Pheisaihzy Abeipa ta a tah.
Asuria cha ei râh lia tlai ta parao aw na ta, Ei tlâhzy liata phei ta ei tlypâ aw; A raopaky cha ei phopi tawhta pahluhpa châ aw ta, A phaohri ama ngiatlâh tawhta pachhôpa a châ aw,” Tahpa ta bie a taih ha ta.
Hy Philistinâ râh zydua saih u, Nâmo châ tupa chôchahrei a tlie hapa vâta a ly hlei khuh vy; Vâzi thari tawhta chyuphao vaw thao aw ta, A thei cha vâzi mei a zawtheipa a châ aw.
Dyhchhie chaipazy chhao ta, Ama tlaih nawpa sibiepa su hnei aw ei ta; Dyhchhiepazy â bohpa ta amâ zia aw. Nâma thari deikua cha, Chakâhna ta thie aw na ta; Na chyhsa laibâhpazy cha, Chakâhna ta a thie khai aw ei.
Hy thokhy chhikao y, thata cha la, Hy khihpi y, awh teh; Hy Philistinâ râh zydua saih u, Nama zydua ta chipa ta zao khai teh u! Maw lâ tawhta meikhuh za pua ta, A pheisaih hry liata hnôh a khawpa rai y veih ei.
Râh vyuhpa lyuhchâpazy cha, Kheihta a chhy awpa ma a châ aw? “ Abeipa ta Zaio padua ha ta, A phopi saw pasa a taopazy cha, Cha liata amâ chhai aw,” Tahpa ta a chhy awpa a châ.