Bala, Sẽn-Ka-Saab na n zoe a Zakoob yagensã nimbãanega, bãmb na n leb n yãka Israyɛll n kõ-b vʋʋsg b tẽngẽ wã. Sãamb n na n naag bãmb tɩ b tɩ lagem a Zakoob roogã nebã.
Bu-zẽms n na n deeg Israyɛll nebã n tall-b n tɩ kẽes b tẽngẽ wã, la Israyɛll nebã na n sooga bãmb beenẽ Sẽn-Ka-Saab tẽn-gãongã zugu, n kɩt tɩ b yɩ yem-daado, la yem-pogse. Neb nins sẽn dag n kẽes Israyɛll nebã yembdã, Israyɛll na n kẽes-b-la yembdo, Israyɛll nebã na n sooga neb nins sẽn dag n namsd bãmbã.
Kɩɩm-kulg sẽn be tẽngrã rigimdame n na n deeg foom f waoongã daare. Fo yĩng kɩtame tɩ b nek sẽn ki-bã, b neka dũniyã nin-kãsemsã, la b kɩt tɩ bu-zẽmsã rĩm-dãmb fãa yik b naam gɛyã zutu.
Fo rag n yetame: «Mam na n dʋʋ n taa saasẽ, mam na n zẽka m naamã geer n zʋʋg Wẽnnaam ãdsã, Mam na n zaoonda sɛk tãngã zugu, tãng ning sẽn be rɩtg hal zĩ-zãrgẽ wã.
Neb nins sẽn na n yãnd foom na n yonga b nin n get foom. B na n maaga b meng n ges foom n yeele: «Rẽ yĩnga, ka rao-kãngã n dag n kɩtd tɩ dũniyã miimdẽ, la a kɩtdẽ tɩ soolem-dãmbã rigd ne rabeemã la?
La foom yẽ, b loba foom yɩng n zãag f yaoogã, wa b sẽn lob tɩɩg wil-yooko, wa neb b sẽn kʋ ne zabr sʋʋg n wʋk n tɩ lob bog-zulungã kug zutu, wa kũum b sẽn tabe.
Maam a Saasẽ-Pãng-Soabã yetame: «Mam na n yik n zaba ne bãmba, mam na n menesa Babilond yʋʋrã, ne a nebã sẽn kellã ne a kambã la a yagensã. Maam a Sẽn-Ka-Saab n yeele.
Filistẽ-dãmbã fãa, da-y maan-y sũ-noogo, dasaar ning b sẽn dag n tar n pãbd yãmbã sẽn kao wã yĩng ye! Bala, waafã yagensẽ wã, põeer n na n yi beenẽ, la a biigã na n yɩɩ wag-bɛɛg sẽn yɩgda.
Dẽ, sẽn ya-b nimbãan-neb n yɩɩd fãa wã na n paam n dɩ n tɩgame, naong rãmbã na n gãee ne bãane. Mam na n kɩtame tɩ fo yagensã ki kom, ne fo neb nins sẽn na n kellã.