Ika Bible 2018
|
| 1 |
| Ọnwan wụ ihiẹn Osolobuẹ ku banyeni alị Mụabụ: E tikpọ wẹ obodo Arẹ rị alị Mụabụ la iwi, e gi wẹ akpụ uhinhin ohu sụọ tikpọ a! E tikpọzịkwọ wẹ Kiri rị alị Mụabụ la iwi; e gi wẹ akpụ uhinhin ohu sụọ tikpọ a! |
| 2 |
| Ndị bi Dibọnụ alị Mụabụ e shigụọ ụlọ-mmọn lẹ ebe wẹ nọsọnmẹ a chụn ẹjan d'a kwan ẹkwan; alị Mụabụ hụzị e goo alị wẹ wụ Nebo lẹ Mẹdẹba. A kọgụọ wẹ isi ile, kọpụ ẹtu ile. |
| 3 |
| Wẹ yihụ ẹkwa-achọ a kwan imẹ ọgbara-ogbe wẹ yeni ihiẹn mẹni wẹ; kẹ ebe ịhịan a nọdị elu ụlọ kẹ ebe ile ịhịan e kokomẹ kẹ wẹ ile nọsọnmẹ e goo; e fiẹnrinhụ a kwan. |
| 4 |
| Ndị bi Hẹsh'bọnụ lẹ Ẹlialẹ hụzị a kwan ẹkwan, olu ẹkwan wẹ rukwọrị obodo Jahazị. Ihiẹn ndịnị ile kẹ oro gi e fe ndị-agha Mụabụ isi, ndụn hụ a gụ wẹ. |
| 5 |
| Omikẹn Mụabụ e mẹgbu m; wẹ hụ a gbarukwọrị Zụa, a gbaruzi Ẹglatị-Shẹlishiya. E nyinrin wẹ elu òke shi Luhiti, kwankọ jẹnkọ; wẹ hụzị ụzọ Horonaim, a kwan, makẹni e tikpọgụọ wẹ wẹ. |
| 6 |
| Mirin wẹ wụ Nimrim a tahị, ẹfịfịa wẹ e shinwụn; ihiẹn-akụnkụn a la, onwọnzini ẹhụhụọ-oyiyi họdụnị. |
| 7 |
| Ufiri ẹ, ndị Mụabụ hụ a kwarị akụ-lẹ-ụba wẹ a pụ, e fetu Ọdanmgbugbu Osisi-pọpla. |
| 8 |
| Ẹkwan wẹ e rughọdẹ ebe alị Mụabụ ru; ogigo wẹ rị e goo e rukwọrị Ẹglaim; ụya wẹ rị a kwan e rukwọrị Biẹ-Ẹlim. |
| 9 |
| Ẹdeke e jundẹ mirin obodo wẹ Dimọnụ, kanị m'e ke mẹgụ Dimọnụ ihiẹn m k'e mẹ ẹ — ẹwọrọ ya d'a maye ndị Mụabụ — kẹ ndị hụn isi gbapụ kẹ ndị họdụ imẹ alị Mụabụ. |
| Save Notes |
https://beblia.bible:81/BibleAudio/ika/isaiah/015.mp3
66
15