Maan-sɩdã na n kɩtame tɩ naam geerã paam pãnga. La sẽn na n zaoond-a beenẽ wã na n yɩ a Davɩɩd yageng sẽn yaa sɩd soaba. Yẽnda na n yɩɩ bʋ-kaood sẽn baood zemsgo, la sẽn kaood bʋʋd ne tɩrlem.»
Tõnd wʋma Moaab nebã wuk-m-mengã kibare. Bãmb wuk-m-mengã yaa n looga nugu. Tõnd wʋma bãmb sek-m-mengã ne b wuk-m-mengã, la b tɩtaamã ne b pẽg-m-mengã sẽn ka yõodã.
Bala, Hɛsbon tẽngã bõn-koaadl kiidame. Buud toay-toayã taoor dãmb kɛɛ Sibma tẽng reezẽ tɩ-sõamyã. Reezẽ tɩɩgã rag n tẽeme n tãag Yazɛɛre, n tud n kẽ we-raoogã. A wilã tẽeme n gãndg yamsem kʋɩl-kãsengã.
Woto kɩtame tɩ mam na n yãb Sibma reezẽ tɩɩgã, wa Yazɛɛr sẽn yãbd-a wã. Hɛsbon ne Eleyale, mam na n madga yãmb ne m nintãm, bala, yãmb bõn-koaadlã rɩkr ne reezẽ tɩɩsã wobr wakat kelemsã sɛɛme.
Sũ-noogã ne kɩdengã sɛɛ pʋtẽ wã. Sũ-noog kaasg ne kilsg ka leb n be reezẽ tɩɩs pʋtẽ wã ye! Reezẽ-woabdb ka leb n wẽkd reezẽ rãam sĩmsẽ ye. Mam kɩtame tɩ sũ-noog kaasg sɛ.
La moasã Sẽn-Ka-Saab yetame: «Yʋʋm a tãab sẽn wate, wa sẽn zems yʋʋm sõor ning tʋmtʋmd sẽn tʋmd yaood yĩngã, Moaab ziirã na n lebga paoogre. Baa yẽnda neb kʋʋngã sẽn yaa to-to wã, neb nins sẽn kellã na n yɩɩ bilf bala, la b ka na n zeng bũmb ye.»