Engopikini Isirael ni eyuunor, edaun apolou a Damasko. Ngitunga a Siria lu idongete eyarete irumete ngileech loger a Ngisirael alu idongete eyarete. Alimu ayong Akuj Namerikanyer nguna.”
Ngitunga ngidikidio idongete eyarete, ikokini Isirael ekitoe a akimiet, lo ageror ageor keng daang, kidong ngaarei kori ngauni nateni na alokidiama, kidong ngoomwon kori ngakan nateni nache. Alimu ayong Ekapolon Akuj na arai Akuj a Isirael na etaleuno nguna.”
Nyeringa nabo igienokinosi ngikenoi a ngakipeyos lukolong asubete kesi ngikulepek, kori nyeringa igienokinosi etich a ngakan kech, lo erai akisikwaanet a akuj anaberu enyaritae Achera, ka ngikenoi lukinomet emitina.
Ani enangi akolongit ngina, eramakinio alorerea alu edukitoe ngawasea, sodi kimiekinae inyasuna loger a ngirerea alu kolong aisikinete Ngiipi, ka Ngiamor na amatarotor ani a Ngisirael
Ijukuna ngakwapea loger a ngakipi ana ibiruno lokojokon. Nakaneni ikilakini Akuj kesi tamataros nikalonan. Ekutario nikalonan loger a ngatunyeny ana ekusi ekuwam alomoru, ekutario loger a apua ana eyei lokuwam lo edirisit.