×

Ika Bible 2018

Azaya 18

1
Nsọngbu k'a rịnị ị, alị ahụn wẹ gi nku rị e feni a zụn ụzụn marịn, hụn rị isi Iyi Naịlị imẹ alị Ẹtiopịa,
2
hụn e zi ndị ụkọ gi ụgbọ-mirin a ghaha ohimin; imẹ ụgbọ-mirin ndị wẹ gi ẹfịfịa papirọsụ mẹmẹ. Jẹn ni, ndị ụkọ ijẹn a kẹrẹ, buru ni ndị alị Ẹtiopịa, ndị hụ sue usue, nwọnkẹlẹni ẹṅẹnrẹn ẹhụ; ndị ahụn w'a tụ egun wẹ — kẹ ẹhụ-nsue kẹ ebe teni; ndị zegbu enwẹn wẹ hụn a zọgbusọnmẹ ndị ọzọ; ndị hụn iyi kebesọnmẹ alị wẹ.
3
Ụnụ ile rị ụwa, ụnụ ndị bi elu-ụwa! Ụnụ k'a hụn a kẹ w'a hụn flagị-ahịma rị elu ugu; Ụnụ jẹnkọ d'a nụ a kẹ w'a nụ opi.
4
Ọnwan wụ ihiẹn Osolobuẹ gwa m: “M k'a gha ebe m rị e tu udọn e lee wẹ, nọkẹ uwowo ya lẹ anwụn a wị; nọkẹ igirigi a rị imẹ-elu ya lẹ uwowo a wị ogẹn anwụn w'a ghọ ihiẹn-ugbo.”
5
Makẹni, wẹ gini d'a ghọma ihiẹn-ugbo, hụn mkpụkpụma gi danpụgụ, obobo e họnringụọ ogbe-vaịnị, chanma, o k'e gi ẹbeke obechan bepụchanrịn vaịnị ndị suekọnị, bepụchanrịn agalaba-vaịnị ile rị a kụnị, kpọnzụka.
6
Ọ la wẹ tọnị nnụnụ a kpa elu-ugu e ri anụ lẹ anụ ndị-ọzọ e ri anụ; nnụnụ ndị ahụn e ri wẹ ọkọkị e we gụ, anụ-ọfịa e ri wẹ udu-mirin e we gụ.
7
O ru ogẹn ahụn, ndị ahụn e wẹhẹmẹni Osolobuẹ ihiẹn ile rị okpuru ẹ ihiẹn, ndị hụ sue usue, nwọnkẹlẹni ẹṅẹnrẹn ẹhụ; ndị ahụn w'a tụ egun wẹ — kẹ ẹhụ-nsue kẹ ebe teni; ndị zegbu enwẹn wẹ hụn a zọgbusọnmẹ ndị ọzọ; ndị hụn iyi kebesọnmẹ alị wẹ. Ugu Zayọnụ, ebẹhụ ẹfan Osolobuẹ ihiẹn ile rị okpuru ẹ rị kẹ wẹ k'e wẹhẹ oyiye ndị hụ.
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc
:
Save Notes