1
Bûbû nî ûntû bûrîa Isaya mûtaana wa Amozi oonere bwegiî Juda na Jerusalemu.
2
Gûgaakara atîrî, matukû ja nyumeene, kîrîma kîa nyomba ya MWATHANI gîkaa gîkîraaja nkûrûki ya irîma bionthe, kîthûngûûrwe îgûrû rîa irîma bingî; nayo mîgongo yonthe îgaakuûkagîra kîrîma kîu.
3
Antû ba mîgongo îmiingî bakeeranaga: “Njûûni twitie kîrîmeene kîa MWATHANI, twîteni nyomba ya Mûrungu wa Jakubu; nîkenda atwoneeria njîra ciaawe naatuî twithingataga.” Nîkwîthîrwa Zaiûni nîkû Waatho bûkaumaga; rûteto rwa MWATHANI nî Jerusalemu rûkaumaga.
4
MWATHANI akaagambagîra antû babaingî, na agiitagîre mîgongo magamba nabo bagaatura nchiû ciaao ciee machembe ja kûrîma, najo matumo jaao jatuîke tûchiû twa gûketha; mîgongo îtîcoka kwithuranîra nîûntû bwa ndwaa kaîrî, kana iithûkanîra kaîrî.
5
Buî nchiarwa cia Jakubu, njûûni twîte tûmûrîkîri nî weerû bwa MWATHANI.
6
Gwe nî wîrûkîrîte antû baaku, ba rûrîîjo rwa Jakubu, nîûntû bathingataga nkuagaya cia kuuma bwa gaiti; batuîkîte aringia ta Afilisti, na nî bagwatanagîra na antû batiijî Mûrungu.
7
Nthîgûrû yaao yûjûri fetha na thaabu, na ûtonga bwaao bûtî mûthia. Nthîgûrû yaao yûjûri mbarathi, na ngaarî ciaao cia ndwaa itîtarîka.
8
Nthîgûrû yaao yûjûri mîrungu ya mîng'uanano baturagîria maru into bathithîtie na njara ciaao bongwa, bakathaathayia ngûgî cia njara ciaao.
9
Tontû bûû, antû nî bairingîte nthî, baciîkîrithia nthao; menya ûbarekera.
10
Toonyeni makurunguune ja maiga; iciitheni marinyeene nthîgûrû, bûmatûke mûthûûro jwa MWATHANI, na inya ya ûkumio bwaawe.
11
Antû barîa baineneagia bakeenîkwa naru rwikumio rwa antû rûkaathirua; MWATHANI wenka noowe ûgeekagîîrwa îgiita rîu
12
Nîkwîthîrwa MWATHANI Mweneinya nî atuîte ntukû ya îkanûkia nîûntû bwa aikumia na aciîkîîri bonthe, nîûntû bwa barîa baciûkagîîria na barîa baineneagia;
13
nîûntû bwa mîtarakwa yonthe ya Lebanoni, îrîa îreete, îgaitia îgûrû; nîûntû bwa miuuru îrîa mînene yonthe ya Bashani;
14
nîûntû bwa irîma birîa biraaja bionthe, na nîûntû bwa tûrîma tunthe tûrîa tûthûngûki;
15
nîûntû bwa mînaara îrîa mîraaja yonthe na nîûntû bwa nthingo irîa ndikie cionthe;
16
nîûntû bwa meri cionthe cia Tarishishi na nîûntû bwa itarû birîa bithongi bionthe.
17
Antû barîa baineneagia bakeenîkwa naru rwikumio rwa antû rûkaathirua; MWATHANI wenka noowe ûgeekagîîrwa îgiita rîu.
18
Mîrungu yonthe ya mîng'uanano îkaathira buru yûrîrie.
19
Antû bagaatonya makurunguune ja maiga na marinyeene nthîgûrû, bamatûkîte mûthûûro jwa MWATHANI na inya ya ûkumio bwaawe, rîrîa agookîîra gûkanûkia nthîgûrû.
20
Îgiita rîu antû bakaagerera mpuko na ireere mîrungu yaao ya mîng'uanano ya fetha na ya thaabu îrîa baithithîrîtie nîkenda bamîthaathayia,
21
nîkenda boomba gûtonya makurunguune ja maiga, na mbatueene cia ndwara cia maiga, bamatûkîte mûthûûro jwa MWATHANI na inya ya ûkumio bwaawe, rîrîa agookîîra gûkanûkia nthîgûrû.
22
Ûgéeka wîrîgîîro kîrî muntû, nîûntû nî gîntû gûtîkîo, naarua arî o, rûûjû atî o.
Songe Bible 2018
KIMERU BIBLE WITH DC Bible Society of Kenya, 2009, 2018