×

Ika Bible 2018

Azaya 24

1
Lee ẹ, Osolobuẹ jẹnkọ d'e tikpọ ụwa, wiwipụ a; o k'e wiwi ihiẹn rị elu ụwa, feyịya ndị ile rịn'a —
2
ihiẹn ohu hụ jẹnkọ d'e kunrun ịhịan ile — kẹ ndị nchụn-ẹjan kẹ ndị mmaka, kẹ odibo-okẹnnyẹ kẹ onyẹ-nwọnni ẹ, kẹ odibo-okpoho kẹ okpoho ọ rị iwe ẹ, kẹ onyẹ e reni kẹ onyẹ e ṅọnni, kẹ onyẹ e zinrinni kẹ onyẹ e zinyeni, kẹ onyẹ gi ụgwọ kẹ onyẹ wẹ gi ụgwọ.
3
Osolobuẹ k'e mẹ ụwa ile la iwi, kpọnpụchanrịn ihiẹn ile rịn'a. Ya kẹ Osolobuẹ ku!
4
Elu-ụwa a kpọpụ nkụn, shinwụn; ụwa ile a la iwi, shinwụn; ndị nwọn ọghọ rị elu-ụwa a la iwi.
5
Ndị bi elu ụwa e mẹrụchanrịngụọ ụwa; a dangụọ wẹ iwu ndị wẹ ye wẹ, e sọnni wẹ uhi wẹ yini wẹ; e tikpọ wẹ nkwerigbama itẹbitẹ Osolobuẹ.
6
Ya kẹ abụmọnụ gi e ripụ elu-ụwa, ndị rịn'a k'e gi isi wẹ buru eje-ihiẹn wẹ mẹ. Ya haịn ọkụn gi dụnpụ ndị rị elu-ụwa, ndị họdụnị e hizini kaka.
7
Manya ọhụn a kọgbu enwẹn ẹ, makẹni vaịnị wẹ gi e mẹmẹ manya e shinwụngụọ; ndị mmẹmmẹ a sụọ hụ a sụn udẹn;
8
ịghọghọ ndị a kụ ẹgede-chakachaka a kụsị; ụzụn ndị ẹhụ rị a tụ e bi, ụbọ wẹ gi e nwọn anwịnrịn ahanzịnị.
9
Arịzị wẹ a bụ ẹbụ a ra manya; manya e nwunye ẹnya rị nwan e lu ndị a ran'a ilu ọnụ.
10
Obodo hụ wẹ tikpọ a gba okpokoro; a kpọkinchanrịngụọ wẹ ụlọ ile makẹ ịhịan gha a banye ẹ.
11
Wẹ rị nwan ogbe a kwan, “Ye ẹnyi Manya! Ye ẹnyi Manya!!” Ịkwan-ụya a nọkingụọ ẹnya ịghọghọ ile; ịghọghọ arịzị elu-ụwa kaka.
12
A lagụọ wẹ obodo nwẹn tọ mkpọkọ-mkpọkọ, tigungwọn ọnụ-mgbọn ẹ.
13
Ẹrịra k'ọ k'a rị elu ụwa lẹ imẹ alị ichẹn-ichẹn — nọkẹ ebe wẹ nọ fịanrịngụ olivu, mọbụ ebe wẹ nọ ghọ vaịnị, ọ họdụsọnmẹ ohu-ohu wẹ ghọghafe.
14
E weshi wẹ nwan olu elu yimẹ oro ịghọghọ; ndị rị ẹbamịn ọdịdan-ẹnyanwụn hụ e yi nị Osolobuẹ e hikẹ ogbe.
15
Ndị rị ẹbamịn ọwụwa-ẹnyanwụn yemẹ ni nwan Osolobuẹ ọghọ; ja nị ẹfan Osolobuẹ wụ Chuku Izrẹlụ mma imẹ alị ndị hụ tegbu enwẹn ẹ rị mkpẹnrẹn ohimin.
16
Ẹnyi hụ a nụ ẹbụ wẹ rị a bụ elu-ụwa ile, a sị, “Ịja-mma ya rịnị Onyẹ ahụn wụ Onyẹ ezi-omumẹ.” Kanị, m sị, “Ẹhụ a gbọrọ m, ẹhụ a gbọrọ m! Ndụn a gụ m! Ndị ẹro hụ e re ịhịan! Ndị ẹro hụ e gi ẹro e re ịhịan.”
17
Ihiẹn-egun lẹ mgbugbu lẹ ọnyan rị e che ụnụ, ụnụ ndị rị elu-ụwa.
18
Onyẹ hụn isi gbanahịn ihiẹn-egun ahụn, ọ danye imẹ mgbugbu; onyẹ hụn isi gha imẹ mgbugbu hụ nyinpụha, ọnyan a nwụn a. Ụzọ mirin rị elu-igwere a gụnpụsọnmẹgụọ, iyetọ ụwa hụ e zinzin.
19
Elu-ụwa a wahị; elu-ụwa e tiwapụ; elu-ụwa e zinzin ọda-ọda!
20
Elu-ụwa rị e ruehunmẹ kẹ onyẹ-manya, a mahihie kẹ ụlọ-ubi ufere rị e zinzin; nnupụ-isi ẹ rị e gbu ẹ hụn o k'e gi danchanrịn, o lihikọzị.
21
O ru ogẹn hụ, Osolobuẹ k'e ye ihiẹn rị igwere afụnfụn imẹ elu-igwere, yezikwọ ndị-nze rị ụwa afụnfụn elu-ụwa.
22
Wẹ k'e kpọngbama wẹ ile, kẹ wẹ e kẹngbama ndị rị ngan; wẹ k'a kpọkin wẹ ye imẹ ngan, a nọbie wẹ ebẹhụ, e ye wẹ wẹ afụnfụn.
23
Ifẹnrẹn anịkọ ifọn ti, ụya anịkọ anwụn mụ; makẹni Osolobuẹ nwọn ikẹn ile k'a rị a kị; Ugu-Zayọnụ, imẹ Jerusalẹm, k'o k'a nọ kị ọkịkị hụn k'a ghọsị ọghọ a idẹnya ndị-isi Jerusalẹm.
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc
:
Save Notes