|
| 1 |
|
| Reeba Nyakubaho aryahwerekyereza ensi, agihindure amatongo. Aryagijuumika, ataataanise abagitwiremu. |
|
| 2 |
|
| Haza ebe eti: Ekiriba aha bantu, nikyo kiriba n'aha muhongyerezi; Ekiriba aha muhuuku, nikyo kiriba ahari mukama we; Ekiriba aha muzaana, nikyo kiriba ahari mugore we: ekiriba aha muguzi, nikyo kiriba aha mutunzi; Ekiriba aha muntu orikuguza, nikyo kiriba ahari orikweguza; Ekiriba aha muntu orikwihuza, nikyo kiriba n'aha muntu orikwihuzibwa. |
|
| 3 |
|
| Ensi eryacwekyerezibwa, enyagirwe kimwe. Ekyo Nyakubaho niwe akigambire. |
|
| 4 |
|
| Ensi neeganya, neehotoka. Ensi yoona neehononoka, neehotoka. Eiguru n'ensi bihwaire aha magufa. |
|
| 5 |
|
| Ensi esiisirwe abagitwiremu, ahabw'okuba bakahenda amateeka, baayanga kukuratira ebyatairweho, baita endagaano etahwaho. |
|
| 6 |
|
| Nikyo ensi eriitirwa omukyeeno, abagitwiremu bakaguma barimbagiriirwe ahabw'orubanja; Nikyo abagitwiremu baryokibwa, bakatsigara mbarwa. |
|
| 7 |
|
| Viino n'ey'eifa, omuzaabibu niguhononoka; boona abaabaire bashemererwa hati nibatsinda. |
|
| 8 |
|
| Okushemererwa kw'abarikuteera enjogyera kucecekire, akaari k'abarikunanuka kahongoize, |
|
| 9 |
|
| n'okushemererwa kw'abarikuteera amagobore tikwakiteeza. Tibarinywa bundi viino nibeeshongora; amakuuta garyashaariirira abarikuganywa. |
|
| 10 |
|
| Orurembo orubaire rutaine buteeka rusheenyukire, Amaju goona gakingire, ngu hatakaagira owaataahamu. |
|
| 11 |
|
| Nibaboroogyera omu nguuto, ahabw'okuburwa viino; Okutokoorekana kw'abari aha tereko kurugirwemu okurimbagirirwa. Okwesiima kw'omu nsi kuhwaireho. |
|
| 12 |
|
| Orurembo tirubaire kindi, kureka amatongo, amarembo gaarwo gasheenyirwe, gaacwekyerezibwa. |
|
| 13 |
|
| N'ahabw'ekyo nikwo kiriba omu mahanga g'omu nsi, nk'oku bateera emiti y'emioliva, nari nk'oku bahumba emizaabibu, eishaaruura ryayo rihwaire. |
|
| 14 |
|
| Aba Yuda abarirokoka baryaimutsya amaraka, beeshongore ahabw'okushemererwa Abariba bari oburengyerwa-izooba baryateera akaari k'okusingiza Nyakubaho. |
|
| 15 |
|
| Reero nu, ab'omu burugwa-izooba ka bahimbise Nyakubaho, n'ab'aha myegyeego y'enyanja basingize Mukama Ruhanga wa Isiraeli. |
|
| 16 |
|
| Turyahurira ebyeshongoro by'okuhimbisa Nyakuhikiriire ow'ekitiinwa, nibiruga aha muheru gw'ensi. Kwonka, nyowe ningira nti: Mpwaire aha magufa! Mpweire aha magufa! Ai bambe, ka naareeba! Ahabw'okuba abarikureebya nibareebya; abarikureebya nibareebeza kimwe. |
|
| 17 |
|
| Iwe mutuuzi w'omu nsi 'we, ebirikutiinisa n'obusya n'emitego bikutegyereize. |
|
| 18 |
|
| Orihunga enduuru y'ebirikutiinisa, aryagwa omu kiina, kandi orisharabamba naaruga omu kiina aryagwa omu mutego. Ahabw'okuba eiguru riryafukunkura enjura, obuhamizo bw'ensi butengyeete. |
|
| 19 |
|
| Ensi eyatikiire kimwe, ensi eyabiire kimwe, ensi etengyeetsiibwe n'amaani! |
|
| 20 |
|
| Ensi neetaruza nk'omusinzi, neezonga nk'akaju, ebicumuro byayo bigihingamiire; Neija kugwa kandi teriimuka bundi. |
|
| 21 |
|
| Eryo izooba Nyakubaho aryafubira amahe g'ahaiguru omu iguru, n'abagabe b'aha nsi omu nsi. |
|
| 22 |
|
| Baryateeranirwa hamwe nk'oku embohe zirundaanirwa omu kiina; bakingiranwe omu kihome, bafubirwe, haahinguraho ebiro bingi. |
|
| 23 |
|
| Obwo nibwo okwezi kurishobangirirwa n'eizooba rikabwerabwera; ahabw'okuba Mukama ow'amahe niwe aritegyekyera aha Rushozi Siyooni omuri Yerusalemu; akooreka ekitiinwa kye abantu be abakuru. |
|
|
|
|