1
Euu Osolobuẹ, ịyụ wụ Chuku m; m k'e ye i ọghọ, ja ẹfan ị mma, makẹni y'e mẹgụọ kẹ onyẹ wẹ gi e dọn ẹnya, mẹ okẹn-ihiẹn ichẹn-ichẹn a tụ ẹnya, ihiẹn ndị hụn ị rotọ mbụ-mbụ.
2
Y'e mẹgụọ obodo họnrin mkpọkọ-mkpọkọ, mẹ obodo wẹ tụnhunmẹ mgbọn zeni wụrụ ihiẹn wẹ tikpọ la iwi; okẹn obodo nwẹn ndị alị ọzọ gi e dọn ẹnya arịzị a; atụndọnzikọ w'a.
3
Alị ichẹn-ichẹn zeni jẹnkọ nwan d'e ye i ọghọ; obodo ndị alị ichẹn-ichẹn w'a tụdẹ egun wẹ k'a tụ egun i.
4
Ịyụ wụ ebe ndị igbẹnnyẹ a gbaban, ebe onyẹ mkpa gi a gbaban ogẹn nsọngbu ẹ, y'e kpumẹ ịhịan ebe okẹn ẹbi rị a kpọ, ị wụzị igungun ogẹn anwụn rị ma. Makẹni ihiẹn ndị ẹfọ-njọ rị e mẹ ịhịan nọ kẹ okẹn ẹbi rị a kpọ ẹhụ-ụlọ,
5
ọ nọ kẹ ihiẹn okẹn anwụn e mẹ alị ọkpọ-nkụn. Ịyụ mẹri alị ndị ọzọ rị ichẹn-ichẹn rị a zụn ụzụn, kẹ orukpu-igwere dọn a rọ anwụn, ndị ẹfọ-njọ a bụbehi ẹbụ mmẹri.
6
Osolobuẹ hụn nwọn ikẹn ile k'a nọ elu uguni kwademẹni ndị alị ile oriri, okẹn-oriri manya e nwunye ẹnya — ezigbo anụ lẹ ezigbo manya.
7
O k'a nọ elu uguni tikpọ ihiẹn ahụn kpumẹ ndị alị ile rị ichẹn-ichẹn, ihiẹn hụ fụkpumẹ ndị alị ile rị ichẹn-ichẹn nọkẹ ẹkwa;
8
o k'e luepụ ọnwụn, ọnwụn arịkọzị. Osolobuẹ ihiẹn ile rị okpuru ẹ jẹnkọ d'e finchanpụ ịhịan ile ẹnya-mirin; o k'e wepụ ndị nke ẹ ifẹnrẹn ẹnya elu-ụwa ile. Ya kẹ Osolobuẹ ku.
9
Ogẹn ahụn, wẹ k'a gha a sị, “Ezioku-ezioku, ọnwan wụ Chuku ẹnyi; ịya kẹ ẹnyi gi dọn ẹnya, ọ nọ zụọpụha ẹnyi. Ọnwan wụ Osolobuẹ, ẹnyi gi ẹ dọn ẹnya; nị ẹnyi gi ọzụọpụha ọ zụọpụha ẹnyi ghọghọ, e nwọn anwịnrịn.”
10
Osolobuẹ jẹnkọ d'e gi ẹka rị mma sọn uguni wụ Zayọnụ-Jerusalẹm; kanị o sikọ d'a zọgbu alị Mụabụ, kẹ w'a zọkpụkpọ ẹfịfịa ọkpọ-nkụn imẹ ẹjan w'a kụnye ihiẹn.
11
Wẹ jẹnkọ d'a shịapụ ẹka wẹ ebẹhụ wẹ rị — kẹ ịhịan a shịapụ ẹka e gu mirin. Kanị, kẹ w'a nwanlẹ, Chuku k'e budan wẹ lẹ mpache wẹ.
12
O jẹnkọ d'e wetuchanrịn okẹn mgbọn ụnụ ndị hụ zeni, o we wẹ gbama alị; wẹ k'e wetu wẹ ru alị — ruchanrịndẹ imẹ uzunzun lẹ enwẹn ẹ.
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc