Soaala, yãmb la m Wẽnnaam, m datame n kils la m pẽg y yʋʋre, m datame n wilg y sẽn yaa a soaba. Sɩda yãmb pidsa y kãab-noogã, kãabgo y sẽn zĩnd n tagse, tɩ bũmb ka be sẽn na teem ye.
Yãmb kɩtame tɩ tẽnga lebg kug-saongo, y kɩtame tɩ ka sugr dãmba tãnsoben-dooga tek n lebg raboogo, wilg-m-meng rãmb tẽnga ka le ya tẽng ye, b kõn le tõog n me-a n yik abada.
La rẽ wã yaa y sẽn sõng nin-koam dãmba, n sõng naong sẽn tar b rãmbã, b sẽn da waa n zĩ ne b farã. Yãmb yɩ-la b roogo saag niib wakato, n yɩ b maasem tɩɩga, wĩntoogẽ. Ad-y na-toosa sũura fõta wa saag sobgo,
tɩ b sũ-puura maand wa wĩntooga tʋʋlem sẽn maand ne tẽn-koɛɛnga. Yãmb sɛɛsda wilg-m-meng rãmba bʋʋre. Wala sawadg maasem sẽn woogd wĩndg waolgo, woto me na-toosa sẽn wat n dat n wilg b pãnga, wakat kãng la b noor ka na n le tõog n yaage.
Dũni fãa Wẽnd na n segla dɩɩbo, Siõ tãnga zugu, ninsaalb buud fãa yĩnga. Na n yɩɩ nemd sẽn be kaam, la rã-sõma me pa na n paoog ye, nemd sẽn bʋgse la sẽn tar kaam, rãam sẽn pid rãam, n ka tar zurbzutu.
Baraare b na n yeelame: «Bãmb la tõnd Wẽnde. Bãmb nengẽ la d da gũud fãagre, la b sɩd fãag-d lame, bãmb la tõnd teegre, d kɩdem la d lange tɩ b sɩd fãag-d lame.