Nsọngbu rị e che obodo hụ wụ Sameria, ihiẹn-mma ahụn ndị manya rị a kị Ifrem gi a họnrọn — obobo hụ fapụkọnị, hụn wụ okẹn-mma alị Ifrem — isi-alị a ahụn rị isi ọdanmgbugbu hụn alị a rịgbu enwẹn ẹ mma; nsọngbu rị e che obodo ahụn — hụn wụ ọghọ ndịnị manya budangụ.
Lee ẹ, Di-nwọnni-ẹnyi zila dikẹn hụn ze ọda-ọda, dikẹn hụn k'a maye obodo hụ — nọkẹ ẹkwan-igwere lẹ eje-ufere e tikpọ ihiẹn, lekẹ okẹn-mirin rị e zueni, e hu ikẹn-ikẹn; o zila dikẹn hụn k'e gi ikẹn ma obodo hụ ye alị.
Ndịnị hụzị a hanfie ụkụ yeni manya, wẹ hụzị a kpọgburusọnmẹ yeni manya: kẹ ndị nchụn-ẹjan kẹ ndị-amụma hụzị a hanfie ụkụ yeni manya; manya ara nịzị wẹ marịn ihiẹn wẹ rị e mẹ; wẹ hụ e ruehunmẹ — a hụnfie ọhụn, a hanfie eṅẹn.
Wẹ k'a gwama wẹ oku Osolobuẹ ẹnịna: e ku e kudọnzi, e ku e kudọnzi, a kọwa, a kọwadọnzi — ẹkẹrẹ ebeni, ẹkẹrẹ ebahụn — kẹni wẹ danshi azụụn, rụ ẹhụ, dan ọnyan, a nwụnrụn wẹ wẹ.
O dọnmẹgụ alị ugbo ọhụnma, ẹlẹ ọ kụnma ihiẹn? Ọ kụn ogirigbọn azụụnnị, ọ ghaye osẹn azụụnnị; ọ kụnye ọka-witi ebe furun'ẹ, ọ kụnye ọka-bali ọnọdị a, ọ kụnyezi ọka-spẹtị ọnọdị nke ẹ — ẹlẹ ya?
W'a ra gi ẹgbe wẹ gi a kụkpọ ọka-witi ti ogirigbọn mọbụ gi ụgbọ-anyịnyan pịn osẹn; mkpịnsịn mẹ mgbara kẹ wẹ gi a fịan ogirigbọn; onyẹ e gi ukpokpo a fịan osẹn?