¡Tesko e korona e Samariake kai si o baripe katar e matarne ando Efrain ta katar e lulunllin suki katar o sukaripe katar leko baripe, kai si pe umal e llundi katar gola kai si zalime e moliatar!
E Devle si le iek si zuralo ta gazdaril, sargo balav pherdi krupe ta sargo balav kai zalil, sargo bare paia kai liken avri ta kai zoriaia peraven pe phuv.
Ta ka avel sargo e lulunllin suki katar o sukaripe katar leko baripe kai si pe umal e llundi, sargo e purvo simochina kai likel ando milai ta samo dikhel la vareko, lel la ande pe va ta jal la.
A i gala cherde o bilachipe pala e mol, ta e rachia diliarda len, o popo ta profeta cherde o bilachipe pala e rachia, diliarda len e mol, zalisaile e rachiaia kojadile kana dikhle o suno ta eskombaie pe kris.
Goleke o Del ka del lenchar orba sargo kana si minone kai iakom sikon te chitin. Ta kana ka phiren ka peren e zeenchar, ka dukhavenpe, ka peren ando kojaipe ta ka achen phangle.
Soke phenden: Sovel jalam e merimake, ta diam amaro alav e limoreke, kana ka nakhel e bari balav katar e duk, ni ka resel amende, soke gurudilam ando kojaipe, ta gurudilam ande so inai chachipe,
Goleke o Del phenel gia: Me thodem ando Sion e ezgoda mai preche, iek barr, zumado, kai llal thodi orta, lachi kai si thodi ande phuv ta ni miskolpe, ko ka pachal, te na sigarel.
Ka ortou mi iekhe solea, ka cherav te achel orta mo chachipe. Ka cherav te zatrin e krupe o than kai gurudol o kojaipe ta o pai ka inllarel lengo gurudipe.
Ka phagon e sovel kai jalen e merimake ta o alav kai dien e limoreke ni ka avel zuralo, kana ka nakhel e bari balav katar e duk, ka nakhel pe tumende ta ka ustavel tumen.
Soke o Del ka vazdiniaol sargo o burdo Perasim, ta ka joliaol sargo e umal katar o Gabaon ta so ka cherel o Del ni ka pinllaren le ta ni ka llanen so si gua kai cherel.
Goleke, na maren espurnia, te na chichidiniaol ios tumaro phandipe, soke asundem katar o Del kai si le sa e zor, kai si chinadi zatrania pe sa o sueto.