B na n sika foom tɩ f be tẽng n gomda. Fo goamã ka leb n zẽkd n yɩɩd wubsg ye. Fo koɛɛgã rãamd na n yita wa kɩɩm koɛɛg sẽn walemde, la fo na n paa tẽng tomẽ n walemdẽ.
Zãmsd sẽn yaa to-to wã, la ned sẽn paam vẽnegr to-to yʋngã, neb wʋsg nins sẽn zabd ne Zeruzalɛmã me na n yɩ a woto. Yaa neb nins fãa sẽn na n zab ne-a, n sãam a pãng zĩisã n baood n nams-a wã.
Dẽ, wa kom sẽn tar ned t'a zãms n dɩtẽ wã, n yaool n nek n mik t'a pʋg yaa vɩʋʋgã, la ko-yũud sẽn tar ned t'a zãms n yũud koomã, n wa nek n mik t'a yɛɛme t'a koees yaa koɛɛngã, a na n yɩɩ woto me ne buud toay-toay wʋsgã sẽn na n zab ne Sɩyõ tãngã.
Kell-y n pa-y yɛɛsg pʋg n kaoose! Mum-y y ninã n lebg zoense! Bãmb nens yilimdame la b yaool n ka yũ reezẽ rãam ye. Bãmb lengdame la b yaool ka yũ rã-toaag ye.
Ne yãmba, b sẽn vẽneg yel-kãensã fãa wã wẽnda wa sebr b sẽn gʋls goam a pʋgẽ n yaool n sog-a, n dɩk-a n kõ ned sẽn mi kaorengo, n yeel-a: «M kotame tɩ f karem sẽn gʋlsã,» t'a leoke: «Mam ka tõe n karm-a ye, bala, b sog-a lame.»
Zu-soabã yetame: «Nin-bãmbã me sã n kolg maam, b waoogda maam ne noor bala, la b sũyã zãra ne maam, bãmb sẽn zoet maamã yaa zãmsg b sẽn deeg ninsaalb nengẽ bala.
Rẽ n kɩte, tɩ mam na n kell n maan bõn-bãn tɩ yɩ lingr ne lingr nin-bãmbã yĩnga. Yam-dãmbã yamã na n sɛɛme, la bãngdbã bãngr na n zoe n baoo zĩig n solge.»
Toog na n paama neb nins sẽn solgd b mens n na n zãag ne Sẽn-Ka-Saabã, sẽn na n yɩl n solg b saagrã! Bãmb maanda b tʋʋmã likẽ, la b yetẽ: «Ãnda n ne tõndo? Ãnda soab n mi tõnd sẽn maandã?»
Yãmb sẽn maandã yaa lebende! A zemsame tɩ b ges yagbã wa yagd bɩ? Bũmb tõe n yeela a naandã tɩ ka yẽnda n naan-a sɩda? Rʋk tõe n yeela sẽn yaga yẽnda wã t'a ka tar bãngre?
Sik-m-mens rãmbã na n paama sũ-no-kãseng Sẽn-Ka-Saab pʋga, la sẽn yaa-b naong rãmbã n tɩ yɩɩd ninsaalbã sʋkã na n kɩdma Israyɛll Pʋ-Peelem-Soabã yĩnga.
Bõn-kãng yĩnga, Sẽn-Ka-Saab sẽn fãag a Abrahaamã yeta a Zakoob yagensã yaa: «Moasã, yãnd kõn leb n yõk a Zakoob yagensã ye. Bãmb neng kõn tol n leb n sulg ye.
Bala, bãmb kambã sã n yãnd mam nus tʋʋm nins mam sẽn maan bãmb sʋkã, bãmb na n waooga mam yʋʋrã. Bãmb na n waooga a Zakoob Pʋ-Peelem-Soaba, b na n zoee Israyɛll Wẽnnaamã.