×

BIBELE 1951

Esaia 29

1
Kotsi e tlo wela wene SebešosaModimo, wene SebešosaModimo, wene motse wo Dafida a tlilego a dula go wona. Hlatlamanyang mengwaga, menyanya a e latelane.
2
Ke tlo ba ka pitlaganya SebešosaModimo, gwa tlo ba le dillo le diphegelo, ya tlo ba sebešo sa nna Modimo.
3
Ke tlo go tiela gare ka dira, ka go dikologa ka lengope le ka merako.
4
O tlo kokobetšwa wa bobola o le fase, mme lentšu la gago la sesefa le etšwa leroleng, la etša la seriti le etšwa mobung, wa tlo bolela o hwile lentšu mo leroleng.
5
Manaba a gago madira a ona a tlo ata bjalo ka lerole le le sesane; mašaba a ba sehlogo a tlo ata boka moko ge o fefolwa ke phefo. Ke tše di tlogo tla ka bjakobjako.
6
Morena wa mašaba o tlo go sekiša ka medumo le ka tšhišinyego, ka mokgoši o mogolo le ka sesesedi le ditimo, le ka kgabo ya mollo o tšhumago.
7
Madira a ditšhaba tšohle a tlo etša pono ya bošego ya diloro, le bohle ba go tla go hula. Sebešo sa Modimo le dibo tša sona ba se dikile.
8
Go tlo etša mola wa tlala a lora dijo, a re go phafoga a dumala; le mola e a nyorilwego a lora meetse, a re go phafoga a hwetša a sa lapile, a sa kgalegile. Go tlo ba bjalo ka madira a ditšhaba tšohle a go tlo hula thaba ya Tsione.
9
Lealetšang le tlabege! Tadietšang le bone! Ba builwe, e sego ka sebela; ba a phokaela, e sego ka bjalwa.
10
Ke ka gobane Morena a le tšhetše moya wa boroko bjo bogolo; o le pipa mahlo, lena baporofeta; o le pipeditše hlogo, lena baboni.
11
Bjale dipono ka moka tša lena, di kaka mafoko a lengwalo le le phuthilwego mme la tlemelelwa ka mahuto; la re go le nea motho a tsebago puku la re: O ko e bale! Yena a re: Ga ke kgone; hleng e tlemeletšwe ka mahuto!
12
Ngwalo leo ge le ka le nea mosetsebepuku, la re: O ko le bale! O tla fo re: Ga ke tsebe puku.
13
Mong a bohle o itše: Molato ke ge setšhaba se se mpatamela ka legano, se ntheta ka melomo; mola dipelo tša bona di le kgole le nna; gomme ge ba mpoifa, e fo ba malayabatho a go ithuta.
14
Bjale nna setšhaba se -- ke tlo buša ke se dira ka mokgwa o tlogo tlaba, o tlogo tlaba ruri; bohlale bja bahlale ba bona bo tlo senyega, tlhaloganyo ya bahlaloganyi e se utologe.
15
Kotsi e tlo wela ba ba utamago ba re: Re utela Morena morero wa rena. Ba re mediro ya bona e dule e le leswiswing; ba re: Re bonwa ke mang? Re tsebja ke mang?
16
Mašilo tenang! A letsopa le ka sengwa mmopi? A modiro o ka ra modiri wa re: Ga wa ntira? A sebopša se ra mmopi sa re: Ga o tsebe selo?
17
Ka kgonthe, go šetše go se go kae, ke mo Libanoni a tlogo fetoga tšhemo ya dihlare, mme tšhemo ya dihlare ya tlo ba lesodi.
18
Mehleng yeo mantšu a puku a tlo kwewa ke difoa; mahlo a difofu a tlo tlogwa ke boso le leswiswi, mme a tlo bona.
19
Babotlana ba tlo buša ba thabela Morena, mme batho ba badiidi ba tlo hlalalela Mokgethwa wa Isiraele.
20
Ba bašoro ba tlo ba ba fedile, le ba lonya ba tlo hlokwa, go tlo ba go fedišitšwe ba go loga maano a mabe.
21
Ke bao ba polelo ya go phara batho, ba go dula ba theile ba ba ahlolago mo kgorong, ba go phereketša yo bolo ka tša lefela.
22
Bjale Morena, Monamolela Aborahama o bolela le moloko wa Jakobo o re: Jakobo bjale a ka se lewe ke dihlong, a ka se hlwe a nyama.
23
Gobane o tlo bona bana bagwe, le mediro ya diatla tša ka gare ga bona, a kgetha ina la ka. Ba tlo kgetha Mokgethwa wa Jakobo; ba tlo boifa Modimo wa Isiraele.
24
Ba dipelo tše di timetšego ba tlo hlalefa, mme bangongoregi ba ka se hlwe ba gana thuto.
Sotho Bible 1951
Bible Society of South Africa 1986
:
Boloka Lintlha