|
| 1 |
|
| Nimureebe Nyakubaho Mukama ow'amahe naija kwiha aha ba Yerusalemu n'aha Baayuda ekibaire kibatungire n'eki babaire beegamiire. Abaakye ebyokurya byona n'amaizi goona, ebibaire bibatungire. |
|
| 2 |
|
| Abaakye emanzi, n'omurwani, omuramuzi n'omurangi, omufumu n'omukuru omu ihanga; |
|
| 3 |
|
| omukuru w'engabo makumi ataano, n'omuntu mukuru ow'ekitiinwa, omuhi w'obwengye, n'omufumu n'omuhaki w'engisha. |
|
| 4 |
|
| Reero aboojo mbahindure abategyeki baabo, n'abeereere babe nibo baabategyeka. |
|
| 5 |
|
| Abantu baryahatana: buri muntu na mugyenzi we, buri muntu na mutaahi we; orikunyeeta agaye orikumukira, n'otaine oku ari agaye ow'ekitiinwa. |
|
| 6 |
|
| Obwo omuntu aryakwata mwene ishe omu nju ya ishe, amugire ati: Nk'oku oine eki ojwaire, ba niiwe waaba omutegyeki waitu n'ow'aga matongo. |
|
| 7 |
|
| Eryo izooba onu aryayanga naayamuza ati: Tindikwija kugira eki naabatambira; ahabw'okuba omu ka tiinyinemu byokurya, nobu byakuba ebijwaro. Mutampindura omutegyeki w'abantu. |
|
| 8 |
|
| Manya Yerusalemu esheenyukire! Buyuda yaakumbagara; ahabw'okuba ebi bagamba n'ebi bakora nibigwisa kubi Nyakubaho, bigayisa ekitiinwa kye. |
|
| 9 |
|
| Okugwera orubaju kwabo nikubashinja; nibakora ebibi butunu, nk'aba Sodoma, batarikubishereka. Ebishi baryakareeba! Manya nibo beereeteire akabi. |
|
| 10 |
|
| Mugambire abahikiriire ku bo bariba gye; ahabw'okuba baryananurwa ebi baakozire. |
|
| 11 |
|
| Ebishi omuntu enyabibi aryakareeba! We biryamugyendera kubi, ahabw'okuba ebi yaakozire nibyo arizimuurirwa. |
|
| 12 |
|
| Abantu bangye nibahatwa abaana, bategyekwa abakazi. Imwe bantu bangye 'mwe, abeebembezi baanyu nibabahabya, babuzabuza emihanda ei murikurabamu. |
|
| 13 |
|
| Nyakubaho agiire omu mwanya gwe kutonganisa abantu be, yaayemerera kubacwera orubanja. |
|
| 14 |
|
| Nyakubaho naacwera orubanja abakuru omu ihanga, n'abategyeki b'abantu be, ati: Niimwe mwacwekyereize omusiri gw'emizaabibu; ebi mwanyagire abooro biri omu maka gaanyu. |
|
| 15 |
|
| Mukasiitagurira ki abantu bangye, abooro mukabaitira aha kyara nk'enda? Mukama Ruhanga ow'amahe nikwo arikugamba. |
|
| 16 |
|
| Nyakubaho naagira ati: Abakazi ba Siyooni baine emyekuniko. Nibagyenda babangaraize ebitsya, nibareebesana akatanta k'eriisho. Nibagyenda nibakimbagira, nibarangiza enjogyera aha maguru. |
|
| 17 |
|
| Nikyo Nyakubaho arirwariza abakazi ba Siyooni ebiguuna omu mutwe, akajweka busha ebicweka byabo eby'enshoni. |
|
| 18 |
|
| Eryo izooba Nyakubaho aryabacwijura enyerere zi barikukunisa, abajuure emishwaro n'ebirezi, |
|
| 19 |
|
| ebitaako, endaaba n'ebitambaara by'omu maraka; |
|
| 20 |
|
| ebitambaara by'omu mutwe, engoro, emyeko, otushanduukye tw'emigaju n'engisha; |
|
| 21 |
|
| empeta z'omu nkumu n'ez'omu nyindo, |
|
| 22 |
|
| bushuuti z'aha magyenyi, eminagiro, ekooti ndaingwa, n'enshaho z'omu ngaro, |
|
| 23 |
|
| emyenda y'obutimba n'eya kitaani, ebikwemba by'omu mutwe n'emyenda y'okwetwekyerera. |
|
| 24 |
|
| Omu mwanya gw'emigaju haryabamu ekinuuko, n'omu mwanya gw'omweko beezirikye omugoye. Omu mwanya gw'eishokye ry'omushasha, habe enkomborora; n'omu mwanya gw'okujwara emyenda mirungi beezirikye ebiguniya. Omu mwanya gw'okwemanya oburungi, baitwe enshoni. |
|
| 25 |
|
| Abashaija baawe baryaitwa rurara, n'amamanzi gaawe gagwe aha rugamba. |
|
| 26 |
|
| Amarembo ga Siyooni garyacura, gaboroogye, n'orwo rurembo rube nk'omukazi oshutami ahansi ayeshobeire. |
|
|
|
|