×

現代台語譯本羅馬字版

以賽亞書 30

1
Siōng Chú kóng, “Chiah-ê pōe-poān ê chú-bîn, chhám ah! In bô chiàu góa ê sim-ì, ka-kī tēng kè-ōe, bô chiàu góa ê chí-ì loān kiat bêng-iok, tì-kàu chōe-siōng-ka-chōe.
2
In bô mn̄g góa chiū lo̍h-khì Ai-ki̍p, chhē-kiû Hoat-ló ê pó-hō͘, thang bih tī Ai-ki̍p ê si̍t-kó͘-ē.
3
M̄-kú ǹg-bāng Hoat-ló pó-hō͘, pìⁿ-chòe lín ê kiàn-siàu; kî-thāi Ai-ki̍p tì-ìm, tian-tò hō͘ lín làu-khùi.
4
Sui-jiân in ê koaⁿ-tiúⁿ khì kàu Só-an, in ê sù-chiá phài-kàu Hap-lōe-su,
5
m̄-kú in ta̍k-ê lâng lóng ōe siū-tio̍h bú-jio̍k kiàn-siàu, in-ūi Ai-ki̍p bōe-tàng pang-chān in, bōe-tàng hō͘ in sím-mi̍h lī-ek, chí-ū hō͘ in kiàn-siàu làu-khùi.”
6
Iú-koan Nî-kek-hu Iá-siù ê sìn-sit: Iû-tāi ê sù-chiá chiong châi-bu̍t chài tī lû-á ê ka-chiah, chiong châi-pó khòa tī lo̍k-tô ê ka-chiah-phiaⁿ. In keng-kè kan-lân khùn-khó͘ ê tōe, tī hia ū sai teh háu, ū to̍k-chôa kap pe-chôa, khì kàu bōe-tàng kiù in ê kok-ka hia.
7
Ai-ki̍p ê pang-chān oân-choân bô lō͘-ēng, só͘-í, góa kiò i chòe “Chē-tiāⁿ-tiāⁿ bô lō͘-ēng ê La-hap-pek ”.
8
Taⁿ lí khì, tī in bīn-chêng chiong chiah-ê khek tī chio̍h-pán, siá tī chheh--ni̍h; tī beh lâi ê ji̍t-chí, thang éng-oán chòe kiàn-chèng.
9
In-ūi in sī pōe-poān ê chú-bîn, khi-phiàn ê kiáⁿ-jî; Siōng Chú ê kà-sī, in lóng m̄ thiaⁿ.
10
In kā sian-kiàn kóng, “M̄-thang khòaⁿ īⁿ-siōng.” In kā sian-ti kóng, “M̄-thang kā goán kóng chèng-khak ê ū-giân; tio̍h kā goán kóng goán kah-ì thiaⁿ ê ōe, kā goán ū-giân bô-iáⁿ-chiah ê tāi-chì.
11
Goán beh lī-khui chiàⁿ-lō͘, tùi ti̍t-lō͘ oa̍t-cháu, bô ài koh thiaⁿ-tio̍h Í-sek-lia̍t sîn-sèng ê Siōng-tè ê miâ.”
12
Só͘-í, Í-sek-lia̍t sîn-sèng ê Siōng-tè án-ni kóng, “In-ūi lín kū-choa̍t chit-ê sìn-sit, tian-tò sìn-nāi ap-pek, óa-khò khi-phiàn,
13
só͘-í, chit-ê chōe tī lín sin-chiūⁿ ōe chhin-chhiūⁿ koân-chhiûⁿ ê pit-hûn piak-li̍h, hut-jiân tó-hoāi.
14
I ōe chhin-chhiūⁿ hûi-khì hō͘ sio-hûi sai-hū tōa-la̍t siak, phòa kah chhùi-kô͘-kô͘, bô kah chi̍t tè ōe-tàng the̍h-lâi chhú hé-lô͘ ê hé-chéng, iúⁿ chúi-tî ê chúi.”
15
Chì-koân ê Siōng Chú — Í-sek-lia̍t sîn-sèng ê Siōng-tè án-ni kóng, “Tio̍h hoán-hóe an-hioh, lín chiū tit-tio̍h kái-kiù; tio̍h tìn-chēng sìn-khò, lín chiū tit-tio̍h khùi-la̍t, m̄-kú lín kū-choa̍t.
16
Lín kóng ‘Bô ài! Goán beh khiâ-bé tô-cháu’, só͘-í, lín ōe chin kín tô-cháu; lín kóng ‘Goán beh khiâ khoài-má tô-cháu’, só͘-í, jip lín ê lâng ōe tui chin kín.
17
Tùi-te̍k chi̍t ê lâng hoah, lín chi̍t-chheng lâng tô-cháu, gō͘ ê hoah-hiàm, lín choân-pō͘ cháu-sòaⁿ; chhun--ê, chhin-chhiūⁿ soaⁿ-téng ê chi̍t ki kî-koaⁿ, soaⁿ-thâu ê chi̍t ki tōa-kî.”
18
Siōng Chú iáu-teh thèng-hāu beh si-un hō͘ Sek-an; I it-tēng beh khí-lâi lîn-bín lín. Siōng Chú sī kong-gī ê Siōng-tè; só͘-ū thèng-hāu I ê lâng chin ū hok-khì!
19
Khiā-khí tī Iâ-lō͘-sat-léng, Sek-an ê jîn-bîn ah, lín bōe koh-chài thî-khàu. I thiaⁿ-tio̍h lín thî-khàu ê siaⁿ, ōe si-un hō͘ lín; I chi̍t-ē thiaⁿ--tio̍h chiū ōe ìn lín.
20
Sui-jiân Chú ēng kan-lân chòe pn̄g, ēng khùn-khó͘ chòe chúi hō͘ lín, m̄-kú lín ê Lāu-su bōe koh bih--khí-lâi, lín ōe chhin-ba̍k khòaⁿ-tio̍h lín ê Lāu-su.
21
Bô-lūn lín phian chiàⁿ-pêng á-sī phian tò-pêng, lín ōe thiaⁿ-tio̍h āu-bīn ū siaⁿ tùi lín kóng, “Che sī chiàⁿ-lō͘; lín tio̍h kiâⁿ chit-tiâu lō͘.”
22
Jiân-āu lín beh chiong lín só͘ tiau-khek siuⁿ gûn ê ngó͘-siōng, kap só͘ chù-chō pau kim ê sîn-siōng kā in phah lâ-sâm, chhin-chhiūⁿ kā bô chheng-khì ê mi̍h hìⁿ-sak, kóng, “Mài koh hō͘ goán khòaⁿ--tio̍h!”
23
Chú ōe lo̍h-hō͘, hō͘ lín iā tī thô͘--ni̍h ê chéng-chí seng-tióng, hō͘ thó͘-tōe só͘ chhut ê ngó͘-kok hó koh hong-hù. Tī hit-ji̍t, lín ê cheng-siⁿ ōe tī khoan-khoah ê chháu-po͘ chia̍h-chháu.
24
Lôe-hn̂g ê gû kap lû ōe chia̍h ēng chhiám-á kap pê-á iāⁿ chheng-khì, koh chham iâm ê chhī-liāu.
25
Tī lín ê tùi-te̍k siū tōa tô͘-sat ê ji̍t, in ê siú-bōng-tâi tó-hoāi ê sî, lín múi chi̍t ê tōa-soaⁿ koân-niá lóng ōe ū khoe-chúi ti̍t-ti̍t lâu.
26
Tī Siōng Chú pau-chat I hō͘ I chú-bîn siū ê siong, i-tī I kā in chek-hoa̍t ê tāng-siong hit-sî, ge̍h-niû ê kng ōe chhin-chhiūⁿ ji̍t-thâu ê kng, ji̍t-thâu ōe hoat-chhut chhit pē ê kng, chhin-chhiūⁿ chhit ji̍t kú lóng-chóng ê kng.
27
Lí khòaⁿ, Siōng Chú pún-sin tùi chin hn̄g ê só͘-chāi lâi; I ê siū-khì chhin-chhiūⁿ béng-lia̍t ê hé teh to̍h, chhin-chhiūⁿ ba̍t-ba̍t ê ian chhèng koân. I ê chhùi-tûn chhiong-móa hùn-lō͘; I ê chi̍h chhin-chhiūⁿ teh thun-bia̍t ê hé.
28
I ê khùi chhin-chhiūⁿ tiòng kàu ām-kún ê khoe-chúi; I beh ēng húi-bia̍t ê thai-á thai lia̍t-kok, ēng bé-kā-kiuⁿ tàu tī in ê chhùi, kā in thoa-khì sí-bông-chi-tōe.
29
M̄-kú lín, Siōng-tè ê chú-bîn, beh chhiùⁿ-koa, chhin-chhiūⁿ choeh-kî ê àm-mî teh khèng-chiok; sim-lāi hoaⁿ-hí, pûn phín-á chiūⁿ Siōng Chú ê soaⁿ, chiūⁿ kàu Í-sek-lia̍t ê Chio̍h-pôaⁿ hia.
30
Siōng Chú beh hō͘ lâng thiaⁿ-tio̍h I ui-giâm ê siaⁿ, hō͘ lâng khòaⁿ-tio̍h I hêng-hoa̍t ê chhiú-kut, ū ke̍k-tōa ê siū-khì, thun-bia̍t ê hé-iām, ū chhè-lûi, pō-hong, kap chhin-chhiūⁿ chio̍h-thâu ê peng-pha̍uh.
31
A-su̍t -lâng ōe in-ūi Siōng Chú ê siaⁿ kiaⁿ-hiâⁿ, in-ūi I ōe ēng koáiⁿ-á phah in.
32
Siōng Chú múi chi̍t piàn ēng hêng-hoa̍t ê koáiⁿ kā in kòng, I ê chú-bîn lóng ōe tôaⁿ-khîm phah-kó͘ phòe-ha̍p; tī cheng-chiàn ê sî, I ōe chhut-chhiú kap in kau-chiàn.
33
Tô-hui-te̍k í-keng ūi-tio̍h A-su̍t -ông chún-pī hó-sè, hit só͘-chāi ê hé-khut chhim koh khoah, lāi-bīn ū hé kap chin chōe bo̍k-châi; Siōng Chú ê khùi, chhin-chhiūⁿ teh sio ê liû-hông, beh kā bo̍k-châi tiám-to̍h.
Chinese TTVR
The Bible Society in Taiwan
:
保存笔记