×

Ika Bible 2018

Azaya 32

1
Lee ni ẹnya, eze hụn k'e gi ezi-omumẹ kị lala alala, ịya lẹ ndị-isi hụn k'e gi ezioku kị.
2
Onyẹ-onyẹ imẹ wẹ sikọ d'a wụrụ ebe ịhịan a warị ogẹn okẹn ufere lẹ ebe w'a gbaban ẹbi gha a kpọ; wẹ k'a nọ kẹ mirin iyi imẹ alị ọkpọ-nkụn, lekẹ igungun okẹn-ọmụma imẹ alị anwụn nọ a mụ ọda-ọda.
3
Ufiri wẹ, ẹnya ndị e legha ụzọ ekpukọ isi, ntịn ndị a nụ ihiẹn k'e gọn ntịn.
4
Ndị ghalẹni e rogụ d'e mẹ ihiẹn, k'e nwọnmẹ uche lẹ nghọta, ndị te malẹni ku oku e kumẹ oku ọhụnma.
5
Ogẹn hụ, akpọkọzị wẹ ndị nzuzu marịnlẹni Osolobuẹ okẹn-ịhịan; eyekọzị wẹ eje-ịhịan ọghọ.
6
Makẹni, onyẹ nzuzu marịnlẹni Chuku e ku eje-oku, e ro eje-ihiẹn, e mẹ eje-ihiẹn, e kuja oku Osolobuẹ. O yekọ ndị ẹgụn rị a gụn ihiẹn-oriri, o yekọ ndị ẹgụn mirin rị a gụn mirin.
7
O mẹ nke eje-ịhịan, eje-ihiẹn rị a ẹka ogẹn ile; o ropụha eje-ihiẹn — hụn wẹ gi e kingbu ogbẹnnyẹ imẹ ọgwa, ọsụọn'a nị ogbẹnnyẹ te k'e ri eṅẹn.
8
Kanị, ezigbo ịhịan e rosọnmẹ ezigbo-ihiẹn; ezigbo-ihiẹn k'ọ kwadọn.
9
Ikpoho enwẹn wẹ jun ẹfọ, lihi ni, gọn m ntịn; nụkwọ nị ihiẹn m rị e ku, ụmụ nwọnlẹni ihiẹn e sọngbuni wẹ:
10
ahụa ohu ghafe ẹkẹrẹ, ụnụ ndị enwẹn wẹ jun ẹfọ k'e mẹhunmẹ. Makẹni, vaịnị ụnụ kụnye ugbo emẹkọ; ụnụ ahụnkọ vaịnị ọwụlẹ ghọrị!
11
Ikpoho ndịnị enwẹn wẹ jun ẹfọ, tụkwọ nị egun! Sọngbumẹkwọ nị enwẹn ụnụ, ụmụ nwọnlẹni ihiẹn e sọngbuni wẹ; yipụkwọ nị ẹwuru rị mma lẹ ihiẹn-mma ụnụ, ụnụ e jeri hụn wẹ gi a kwan ẹkwan, kwanma, makẹni okẹn nsọngbu rị!
12
Timẹ ni ẹka obi, kwanma ẹkwan makẹni ugbo ọma ụnụ k'a la iwi, a kwan nị makẹ vaịnị te mịgbu enwẹn ẹ hụn k'a la iwi;
13
kwannị nị alị ile ndị nke m a rụn ugbo, makẹni o jẹnkọ d'e họnrin alị ọfịa buru, alị ogun-lẹ-ọkịnkan weri; kwannị nị ụlọ ile wẹ nọ e ri a ra lẹ obodoni wụ oriri lẹ ẹhụ-ọtụtụ.
14
Ẹghẹẹ, obi-eze jẹnkọ d'a gba okpokoro, obodoni ịhịan jun a gba okpokoro; kẹ isi-obodo kẹ ụlọ-nche uku rịn'a jẹnkọ d'a wụrụ ebe wẹ latọ — ebe jaki-ọfịa lẹ anụmanụ ndị ọzọ nọ a kpa nni, wụrụ a jẹnrin ejẹn.
15
O k'a rị ẹrịra d'e ru mgbe Osolobuẹ gha elu-igwee hukpu ẹnyi Mmọn a, alị ọkpọ-nkụn e họnrin alị e mẹ ihiẹn ọhụnma, alị e mẹ ihiẹn ọhụnma e mẹkẹnmẹ, nọchanrịn kẹ ẹgboko.
16
Ogẹn hụ, ezioku e weri ọnọdị d'e rudẹ imẹ atụ, ezi-omumẹ e weri ọnọdị d'e rudẹ imẹ alị ugbo rị mma.
17
Ezi-omumẹ sikọ d'e wẹhẹ udọn lẹ obi-erumalị; ezi-omumẹ k'e wẹhẹ ẹhụ-ufu lẹ igi Osolobuẹ dọn ẹnya jẹnrin ejẹn.
18
Ẹhụ k'e fu ndị nke m ebe wẹ bisọnmẹ, fu wẹ iwe wẹ rị ichẹn-ichẹn.
19
Ọsụọn'a nị ẹkwan-igwere lẹ ẹbi k'e nutu ẹgboko, ọsụọn'a nị wẹ k'e tikpọ obodo ukuni ile —
20
ihiẹn k'a rịnị ụnụ mma — ụnụ k'a rị a rụn ugbo mkpẹnrẹn iyi rịsọnmẹ alị ụnụ, a hapụ anụmanụ ụnụ nị w'a kpa k'ọ sụọ wẹ!
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc
:
Save Notes