1
Atîrî, îgiita rîgaakinya rîrîa mûnene akaathanaga ûrîa kwagîrîte, na atongeeria ba nthîgûrû bathanage na îota.
2
O mûtongeeria wonthe akethagîrwa akari kîrî antû ta gîntû gîa kûrigîîria ruuo, kana ta antû a gwiciitha kîbuubani; akethagîrwa akari kîrî antû ta kîthima kîa rûûjî rwanda, kana ta mûng'unye jwa iiga rîrînene gûntû gûtî mîtî.
3
Îgiita rîu antû bagaaciûkagîrwa nî jarîa bakoonaga, na beerwa ûntû bakaigua.
4
Barîa bathithangagia mantû o ûu batîthûgaanîtie bwega bakaagîa na mathûgaanio jaboorerete, nabo barîa baarangagia na gîûtû bagaatua kwaragia bwega batarîîrîtie.
5
Biaa bitîcoka kûeejagwa gîtîîo, kana barîa baaî bacoka gûkumagua.
6
Nîkwîthîrwa kîaa kîaragia nteto cia waa, na mathûgaanioone jaakîo nî mîbango ya ûmaramari îîthagîrwa îrî ku. Kîritaga ngûgî o irîa Mûrungu athwîre, ningî gîkagwetanagîria MWATHANI na mantû jatîmwegiî. Gîtîrûmagia muntû ûrî na mpara irio, kana gîkundia muntû ûnyonti rûûjî.
7
Mîbango ya muntû ûmûûî rîonthe nî îmîthûûku; abangagîra bangî mîbango îmîthûûku, akathûûkia muntû ûiinyîîrîtue na nteto cia ûrongo, kinya aijî atî ûu ûiinyîîrîtue nîwe ûrî ûûmeene.
8
Îndî muntû ûmwega athûgaanagia na akathithia mantû jameega, na akarûngamîîra ûûma.
9
Ûkîîreeni buî aka, buî bûtûûraga bûnthinyaarîte, thikîîreeni bwigue ûrîa nkuuga. Buî aka, buî bwonaga teeka bwakinyîre, kindeni matû bwigue ûrîa nkûbwîra.
10
Mwaka jûkîthira kuuma nandî bûkamaka bûrigare, buî aka, buî bûtûûraga kiindajî. Nîkwîthîrwa mîzabibû îkooma, na gûtî maketha bûkoona.
11
Bûbuîrîte kwimakîra buî aka, buî bûtûûraga bûnogokete, bûbuîrîte kwinaina nî kîmako buî bwonaga teeka bwakinyîre. Riteeni nguû cieenu, bwîkîre mathango bûrî na kwithikîîra.
12
Iringaringeeni ibara na kîeba nîûntû bwa miuunda yeenu îrîa mîthongi; rîreeni nîûntû mîzabibû yeenu nandî îtî maciara.
13
Rîreeni nîûntû bwa nthîgûrû ya antû baakwa, nîûntû nandî yûjûri miigua na nkonko. Rîreeni nîûntû bwa ntûûra îrîa yaatûûraga na thîîrî, na nyomba ciaayo, kûrîa gwatûûraga gîkeno.
14
Gîkaro kîa mûnene gîgaatigwa kîrî gîkîtheri; antû bakaamatûka bathire ntûûreene îrîa îrî atûûri babaingî. Ntûûra îrîa mbirigîre na mînaara ya gwiciitha igaatigwa kîthakeene; ntigiri cia kîthaka nîcio ikaamamaga ku, nacio mbûri na ng'ondu nîku ikaarîîjaga.
15
Gûgaakara ûu mwanka rîrîa Mûrungu agaatwînîkîra Roho waawe. Naru rwanda rûgaatuîka muunda jwa irio, nayo miuunda ya irio îgaatuîka mwitû.
16
Rwanda gûkoojûra îota na waagîru bûûjûre miuundeene.
17
Waagîru bûkaareta thîîrî umithio bwa waagîru bûkeethîrwa bûrî ûkiri na gwîtîkania mwanka kenya.
18
Antû baakwa bagaatûûraga ntûûreene irî na thîîrî; batûûrage nja ciaao batî na ûgwati bathinyaarîte.
19
Îndî mwitû jûgatûgûtwa jûthire na ntûûra îkaathirua buru.
20
Naabuî bûkethagîrwa bûrî na kûgwîrua nîkwîthîrwa irio bieenu bikoonaga ngai ya kûng'ana, nacio ng'ombe cieenu na ntigiri cieenu ikaarîîjaga kûrîa ikwenda.
Songe Bible 2018
KIMERU BIBLE WITH DC Bible Society of Kenya, 2009, 2018