Bwa eng’ inye ne ing’emisiei, ama king’emin; ak ne iberberisiei, ama iberberin ichek! Ye ma ing’emisiei, keng’emin: ak ye ma iberberisiei, koberberin ichek.
Iyweisiei kiptengeginik che mi Sion; kigonam botanet che maiywei Kamuktaindet: Ng’o eng’ achek ne imuchi komeng’is ak mat ne igesu? Ng’o eng’ achek ne imuchi komeng’is ak mat ne lalei koigeny?
Inendet ne wendote imanda, ak kong’alali che lititen; inendet ne sasei kelunetab sastaet, ne manamei tugukab kagaigaet, ne timei itikyik si magas agobo korotik, ak ne tuchei konyekyik si mageer yaitiet;
Ibwati muguleldang’ung’ agobo kamuiset: mi ano inendet ne iitisiei, mi ano inendet ne kerei karogendoetab aisurut? Mi ano inendet ne iiti teeksosiek che koen?
Keer Sion, nganasetab igorwekyok che kiging’at: tun keerei konyeguk Jerusalem, meng’otetab kamuung’et, emait ne magiutoi, ne magitutu tigongenikyik agoi, ama ng’etos boroonikyik.
Ago tun tebyei Jehovah kobotech eng’ oloto eng’ etunatennyi, oldab ainosiek che baroen ak kererusiek; ole mabunei moingetab beek ne kikwerie eng’ mugangok che kiwase beek, ama bunei yoto melit ne kararan.
Kagitustus borooniguk; ma imuch kogimit kelutab toloitab melinywa: ma imuch koiito angetab melit: kopcheak anyun barunenikab tuguk che chang’ che kigiluul; kinam che ing’waldos barunenik.