Pwo eng' inyee ne ing'emisyei, ama king'emin; ak ne iberberisyei, ama iberberin icheek! Ye ma ing'emisyei, keng'emin, ak ye ma iberberisyei, koberberin icheek.
Ki aragenso kiptengeginik che mi Zion; ki konam potanet che ma iywei Kamuktaindet. Mwaei icheek kole ng'oo eng' acheek ne imuuchi komeng'iis ak maat ne igeesu? Ng'oo eng' acheek ne imuuchi komeng'iis ak maat ne lalei koigeny?
Ineendet ne wendote imanda ak kong'alaali che lititen, ineendet ne sasei kelunetap sastaet, ne ma namei asoya, ne timei itiikyik si ma kas agobo korotiik, ak ne tuchei konyekyik si ma keer yaityet,
Ibwaati muguleldang'ung' agobo kamuiset: “Mi ano ineendet ne iitisyei, mi ano ineendet ne kerei karagendoetap aisuruut? Mi ano ineendet ne iiti teeksosyek che kooen?”
Keer Zion, nganaseetap igoorwekyok che ki king'at! Tuun keerei konyeguk Jerusalem, meng'ootetap kamuung'et, emait ne ma kiutoi, ne ma kitutu tigongenikyik agoi, ama ng'etos poroonikyik.
Ago tuun tebyei Kamuktaindet ne Toroor kobootech eng' olooto eng' etunatennyi, ye mi ainoosyek che paroen ak kereruusyek, ole ma punei moingetap peek ne kekwerye eng' mugangok che kiwase peek, ama punei yooto meeliit ne karaaran.
Kagitustus porooniguk; ma imuuch kogimit kelutap toloitap melinnywa, ma imuuch koiito angeetap meeliit. Kipcheak anyun parunenigap tuguuk che chaang' che ki kiluul; ki nam che ing'waldos parunenik.