Kana cherela desustar burs kai gazdarila o charo o Ezekias, o Senakerib charo katar e Asiria mardape sa e phuvienchar katar o Juda kai sea zidome, ta lia len peke.
Ta o charo katar e Asiria bichalda te llal o Rabsaser bute boñikonenchar katar o Lakis llik kai o Jerusalem te marenpe e charoia o Ezekias, ta loglo pase katar nakhel o pai kai si chidino mai upre, kai si po drom katar e umal goleki kai jalavel.
Ta likisto te maladol lea o Eliakim chavo katar o Ilsias kai tala leko va saia e charoko cher, o Sebna kai saia pismiri ta o Ioaj chavo katar o Asaf kai saia sudo.
Tu uzdi tut ando Ejipto kai si sargo iek kas phago, kai vareko te mukelpe pe lete ka chinel ta ka jiravel leko va pe ogoia rig. Gia si o Faraon charo katar o Ejipto sa e llenenchar kai uzdinpe ande lete.
A te phenea mange: Ando Del amaro Gazda uzdi amen, ¿Inai gava kai leke thana vazdine ta leke altare ikanda len o Ezekias, ta phenda karing o Juda ta o Jerusalem: Angla gava altar ka blagosin?
Tu nasti ka chere te delpe palpale ni o mai minono sluga katar mo gazda, i te uzdia tut ando Ejipto ta ande leke bordona ta ande llene kai llan pe bordona.
Ondaka o Eliakim, o Sebna ta o Ioaj phende: Manga tutar te de orba amenchar kai sam che sluge ando arameo, soke amen llana te da orba ande goia chib, ta na de orba amenchar ande chib katar o Juda soke asunel amen e llene kai si po zido e foroko.
A o mai baro sudo phenda: ¿A so, mo gazda bichalda man te dav orba samo tuia ta che gazdaia? ¡Iok! ¡Man bichalda i kai e llene kai si po zido e foroko, ta von ta i tumen oma ka jan tumari mel ta ka pien tumaro muter!
Ta te na cherel te uzdintumen ando Del, ta te phenel: Chachimaia o Del ka braduil amen ta kai si ka ni ka avel dino gava foro ande va katar o charo katar e Asiria.
Na asunen e Ezekiase, soke o charo katar e Asiria phenel gia: Cheren manchar e pas, ta aven mande, ta te jal suako lleno katar pi drak, ta suako iek katar po kas simochinengo, ta te piel suako lleno o pai katar po bunari,
Dikhen te na kojavel tumen o Ezekias kana phenel: O Del ka braduil amen. ¿Braduisarde vareka e dela katar aver phuvia katar e zor e charoki katar e Asiria?
Ondaka o Eliakim chavo katar o Ilsias kai saia kai arakhela o cher e charoko, o Sebna kai saia pismiri ta o Ioaj o sudo chavo katar o Asaf, pharrade pe patave ta llele kai o Ezekias ta phende leke so phenda o mai baro sudo.