×

Ziazia Kekeapai 1978

Yesaya 38

1
Ti agu arame re Izikiya adu na kaza naandu sa kina kpio. Yesaya ki ye koyo du ko ni nangia nebi nangia wiri Amosa, ki ya fu ko, “Ya Yekova wẽ: Mo rúgu pa kpuro; bambiko mo nikakpi, mo abáta nga te.”
2
Si du Izikiya ki sa kpakpuko kuti vuro bambu, ki nikpari fu Yekova,
3
ki ya, “Ako Yekova, mi nazungadi ro, mo tíngidi he awere wa mi anata bara bangiro rogo rengo na ziazia kpotore yo, ki nimangi agu apai nangba angba bangiro.” Izikiya ki nikpari akpara gbe ni aume.
4
Si du sangba Yekova ki ye koyo du Yesaya ni, niya:
5
“Mo ndú ki ya fu Izikiya, Ya Yekova wẽ, nga ga Dawidi Mbori, nangia titaro: Mi gi ga kpe, mi nibi aumero a; mo ngére, mi akiisa ga rame na agarã 15.
6
Mi abátasa ro vuru be bakindo aAsuro na gi bakporo re a, mi abánda gi bakporo re.
7
“Gere adú ni yuguyugupai foro be Yekova, ya Yekova amánga gi pai foro gumba ko ho re:
8
Mo ngére, mi asá gu kirima uru du ti tanga nga gu naye ku auru kpakpu úringbisa pa saa nga ga Aza, si ki karaga tihe ku sa yo wa dagba ndue bawe.” Si du uru ki karaga tihe ku sa yo wa dagba ndue bawe ti kpakpu úringbisa pa saa si niye ku ri he.
9
Gu kekeapai nga ga Izikiya bakindo aYudo, ho ko adu ni na kaza, ki hu be gako kaza:
10
Mi aya tigimi, Rogo gi ringbisiringbisi arame mi ka guari erẽ; mi aríma ti angbadimo Baatoro kpikpi aboro tipa yangara gimi agarã dunduko.
11
Mi aya, Mi abí nga Yekova, rogo gu ringara nga ga unga aboro te; mi abí nga aboro berewe dagba araki zegino te.
12
Gi kporo gbisi i tindi he ti re ku sa yo wa kina ga babanda akandoro bamburoko; mi kaĩungare wa kina bamburoko; ko nadia re adia ku sa yo ti útu roko; tona uru da ku yuru mo mbu re;
13
mi kpari da ku wiso; ko nakua amemere dunduko wa bahu; tona uru da ku yuru mo mbu re.
14
Wa mbirambira watadu zire ime, wo mi napaa, mi auko wa mbipo. Bangire mbu be ngera ku ari yo. Ako Gbia, i namanga re gbegberẽ; mo únda nga re!
15
Mi ayá waĩ? Bambiko ko gumba pai fere, ko mangi he ni tiko. Mi andú rurungbura rogo gimi agarã dunduko bambiko gu nirãnirã pai dũ torore yo.
16
Ako Gbia, aboro du ni ungayo mbiko agi apai re, rogo ho yo dunduko du ungare ni nga ga torore. Ako mo húsi re kpotore wasa ki ungasi re!
17
Mo ngére, si adu tipa gi zereda ya mi adu na bakere nirãnirã pai; ono mo abatasi torore be gu due nga ga zirã, bambiko mo ba gimi ingaapai dunduko ku giiro yo.
18
Bambiko ka Baatoro kpikpi aboro tambua nga ro te, kpio arengba nga ka irisa ro a te; agu yo nazorã ku due yo-arengba nga ka maa bangiriyo tipa ga ndikidi rengo te.
19
Gu unga yo, gu unga yo, i natambua ro, wa mi namanga ha rogo gi uru re; baagude ayúgo pa ina pa ga ndikidi rengo fu awiriyo.
20
Yekova ima mbakada tiko ka batasa re, si du ani abí gimi abia ti ni na agu aũworo ahe du na gire, ti agu arame dunduko du ani ni ungarani, rogo ga Yekova bambu yo.
21
Were Yesaya aya, “I dungura zuzu vurumo ka maa ha ti gu pipihe re ni ngua kaza, ko ahú ahu.”
22
Izikiya aya a, “Gine nga gu yuguyugu pai nikayugo ho fere ya mi andú ku rogo ga Yekova bambu yo?”
Zande Bible 1978
La Sainte Bible en Zande Alliance Biblique Universelle, 1978
:
Save Notes