×

現代台語譯本羅馬字版

以賽亞書 40

1
Lín ê Siōng-tè kóng, “Tio̍h an-ùi, an-ùi góa ê chú-bîn!
2
Tio̍h kó͘-lē Iâ-lō͘-sat-léng ê chū-bîn, tùi in tōa-siaⁿ soan-pò͘: In chòe hu-ló͘ siū ê khó͘ í-keng kàu-gia̍h; in hoān ê chōe í-keng tit-tio̍h sià-bián. In ūi-tio̍h só͘ hoān ê chōe í-keng tùi Siōng Chú siū siang-pē ê hêng-hoa̍t!”
3
Ū siaⁿ teh hoah kóng, “Tio̍h tī khòng-iá ūi-tio̍h Siōng Chú chún-pī tō-lō͘, tī hong-po͘ ūi-tio̍h lán ê Siōng-tè khui tōa-lō͘.
4
Ta̍k-ê soaⁿ-kok tio̍h thūn hō͘ móa, tōa soaⁿ sió soaⁿ lóng siah hō͘ pîⁿ; koân-kē bô pîⁿ ê tōe tio̍h pho͘ hō͘ pîⁿ-tháⁿ; khâm-khia̍t ê só͘-chāi hō͘ i pìⁿ-chòe pîⁿ-tōe.
5
Hit-sî, Siōng Chú ê êng-iāu ōe chhut-hiān; choân jîn-lūi lóng ōe khòaⁿ--kìⁿ. Siōng Chú chhin-chhùi án-ni soan-pò͘.”
6
Ū siaⁿ teh hoah kóng: Tio̍h soan-pò͘! Góa mn̄g: Beh soan-pò͘ sím-mi̍h? Tio̍h soan-pò͘: Só͘-ū ê lâng lóng chhin-chhiūⁿ chháu, in ê súi chhin-chhiūⁿ iá-tōe ê hoe.
7
Siōng Chú chhe--lâi ê hong chi̍t-ē sàu--kè, chháu chiū ta, hoe chiū siā. Khak-si̍t, lâng put-kò chhin-chhiūⁿ chháu!
8
Chháu ōe ta, hoe ōe siā, m̄-kú lán ê Siōng-tè ê ōe éng-oán chûn-chāi!
9
Pò hó siau-sit ê Sek-an ah, tio̍h peh-chiūⁿ koân-soaⁿ chhut-la̍t tōa-siaⁿ hoah; pò hó siau-sit ê Iâ-lō͘-sat-léng ah, tio̍h hó-táⁿ, tōa-siaⁿ tùi Iû-tāi ê chèng siâⁿ kóng, “Khòaⁿ leh, lín ê Siōng-tè!”
10
Chì-koân ê Siōng Chú tòa koân-lêng teh lâi lah, I beh ēng koân-pèng chiáng-koân; kap I chòe-hé--ê, ū I só͘ tháu-pàng ê lâng, kiâⁿ tī I thâu-chêng--ê, ū I kái-kiù ê chú-bîn.
11
I beh chhin-chhiūⁿ bo̍k-chiá kò͘ I ê iûⁿ-kûn, beh ēng chhiú âⁿ-óa iûⁿ-á-kiáⁿ, kā in phō tī heng-chêng; I beh chhōa hiah-ê hō͘ iûⁿ-á suh-lin ê iûⁿ-bú ûn-ûn-á kiâⁿ.
12
Siáⁿ-lâng bat ēng chhiú-sim niû hái-chúi, ēng chhiú-chiúⁿ chhek-liōng thiⁿ? Siáⁿ-lâng ōe-tàng ēng poe tóe tāi-tōe ê thô͘-hún, ēng chhìn-á chhìn tōa-soaⁿ sió-soaⁿ?
13
Siáⁿ-lâng ōe-tàng liáu-kái Siōng Chú ê sim, chòe I ê tō-su kā I chí-tō?
14
Siáⁿ-lâng ōe-tàng chòe I ê chham-bô͘, kà I chèng-ti̍t ê lō͘? Siáⁿ-lâng ōe-tàng kà I tì-sek, chí-sī I bêng-tì ê tō-lō͘?
15
Tī Siōng Chú gán-tiong, lia̍t-kok put-kò sī tháng-á lāi ê chi̍t tih chúi, sī thian-phêng téng ê thô͘-hún; hái-tó put-kò sī ke̍k khin ê tîn-ai!
16
Lê-pa-lūn ê chhiū-nâ bô-kàu chòe chhâ-liāu sio, chhiū-nâ lāi ê cháu-siù mā bô-kàu chòe sio-hòa-chè hiàn.
17
Tī Siōng Chú bīn-chêng, lia̍t-kok bô sǹg sím-mi̍h; tùi I lâi khòaⁿ, ta̍k-hāng lóng khang-khang bô chûn-chāi!
18
Án-ni, lín beh ēng siáⁿ-lâng lâi pí-phēng Siōng-tè? Lín beh ēng sím-mi̍h hêng-siōng lâi tāi-piáu I?
19
Kiám beh ēng ngó͘-siōng? Ngó͘-siōng put-kò sī sai-hū chù-chō, kim-chhiūⁿ ēng kim kā i pau, ēng gûn-liān-á kā i chng-thāⁿ.
20
Bô-chîⁿ thang bóe kim gûn ê lâng, in chiū kéng bōe nōa ê hó-chhâ, chhē gâu ê sai-hū kā in chhāi bōe tín-tāng ê ngó͘-siōng.
21
Lín kiám m̄ chai, kiám m̄-bat thiaⁿ--kìⁿ? Tùi kó͘-chá kàu taⁿ kiám m̄-bat ū lâng kā lín kóng? Lín kiám iáu-bē bêng-pe̍k tāi-tōe án-chóaⁿ siū chhòng-chō?
22
Siōng-tè choh-ông chē tī tāi-tōe ê kiong-chhong téng-bīn; tōe-chiūⁿ ê chū-bîn chhin-chhiūⁿ chháu-meh hiah-ni̍h sòe. I thí-khui thiⁿ, chhin-chhiūⁿ teh thoa mn̂g-lî, tián-khui thiⁿ, chhin-chhiūⁿ teh tah pò͘-pîⁿ.
23
I kā thóng-tī-chiá lóng thoa--lo̍h-lâi, hō͘ sè-kan ê léng-siù siau-sit--khì.
24
In tú-tú chiah iā-chéng, tú-tú chiah chai-chèng, tú-tú chiah tèng-kun lo̍h thô͘, Siōng Chú ēng hong kā in chhe, in chiū ta--khì, in chhin-chhiūⁿ chháu-iù-á hō͘ kńg-lê-á-hong chhe-sòaⁿ!
25
Sîn-sèng ê Siōng-tè mn̄g: Lín beh ēng sím-mi̍h-lâng kap góa pí? Sím-mi̍h-lâng ōe-tàng chhin-chhiūⁿ góa?
26
Lín gia̍h-thâu ǹg thiⁿ khòaⁿ-bāi leh, sī siáⁿ-lâng chhòng-chō thiⁿ-téng bān-siōng? Chiū-sī ōe-hiáu sǹg chhiⁿ-sîn ê sò͘-bo̍k koh chhōa in chhut--lâi, ōe-hiáu chi̍t-ê chi̍t-ê kiò in ê miâ Hit-ūi. I ê koân-lêng khùi-la̍t tōa, liân chi̍t ê to bōe làu-kau.
27
Í-sek-lia̍t ah, lí sī-án-chóaⁿ bâi-oàn, Ngá-kok ah, lí sī-án-chóaⁿ kóng “Siōng Chú m̄ chai góa siū--tio̍h ê thòng-khó͘; Siōng-tè bô koan-sim góa ê koân-ek”?
28
Lí kiám m̄ chai, kiám m̄-bat thiaⁿ--tio̍h? Siōng Chú sī éng-oán ê Siōng-tè, sī choân-tōe ê Chhòng-chō-chú; I bōe ià mā bōe siān, I ê tì-hūi bōe-tàng chhek-liōng.
29
Ià-siān ê lâng, I sù in khùi-la̍t; loán-jio̍k ê lâng, I hō͘ in lêng-le̍k.
30
Liân siàu-liân-lâng to ōe ià ōe siān, ióng-chòng ê lâng mā ōe thiám kah tó--lo̍h-khì.
31
M̄-kú óa-khò Siōng Chú ê lâng ōe tit-tio̍h sin ê khùi-la̍t, ōe chhin-chhiūⁿ eng-chiáu thí-si̍t pe-koân; in phun-pháu bōe ià-siān, kiâⁿ hn̄g-lō͘ mā bōe hūn-tó.
Chinese TTVR
The Bible Society in Taiwan
:
保存笔记