1
“Kasị nị ndị nke m obi; rọkọ nị wẹ obi!” Ya kẹ Chuku ụnụ ku.
2
Gwa nị Jerusalẹm oku a rọkọ obi, hịnị n'a ya n'ọ nụ a — nị agha e mẹgụọ a ihiẹn o k'e mẹ ẹ; n'ọ kụgụọ ụgwọ njọ a; nị Osolobuẹ e yegụọ a afụnfụn njọ a, yekwasị.
3
Olu ohu rị a hị, a sị, “Kwanị nị Osolobuẹ ụzọ imẹ atụ; kwanị nị Chuku ẹnyi ụzọ rị mma imẹ atụ!
4
Wẹ jẹnkọ d'e hukinchanrịn ọdanmgbugbu ile, gukpọchanrịn ugu lẹ òke ile, mẹ alị mẹ mkpọke-mkpọke riẹnpụ, mẹ ebe ile riẹnlẹni riẹn,
5
ọghọ Osolobuẹ a pụha ifọn, ịhịan ile a hụn a! Osolobuẹ e giọlẹ ọnụ a ku ẹ!”
6
Olu ohu sị, “Yi oro!” M nọ sị, “Kẹ m k'e yi?” Ọ nọ sị m, “Sị, ịhịan ile nọhụ kẹ irurue, ọghọ ile wẹ nwọn nọchanrịn kẹ obobo rị ọfịa:
7
Irurue e shinwụn eshinwụn, obobo a danpụ yeni uzun Osolobuẹ kunkpu wẹ. Eziẹ, ịhịan wụhụ irurue mmaka.
8
Irurue e shinwụn eshinwụn, obobo a danpụ a danpụ kanị oku Chuku ẹnyi e wuzo jẹnrin ejẹn.”
9
Ịyụ hụn wẹhẹni Zayọnụ ozi rị mma, nyinrin nwan ugu jẹn elu n'ị hị. Ịyụ hụn wẹhẹni Jerusalẹm ozi rị mma, weshi olu elu yikẹnmẹ oro! Weshi olu elu — atụlẹ egun; sị obodo ndị rị Juda: “Lee ni Chuku ụnụ!”
10
Lee n'ẹ, Di-nwọnni-ẹnyi wụ Osolobuẹ gi ikẹn ẹ lala, ọ kpala ikẹn. Lee n'ẹ, o gi ihiẹn ọ rụnpụha lala, ihiẹn ọ rụn sọnla a.
11
O k'e lepụ atụnrụn a ẹnya lekẹ onyẹ e du atụnrụn; ọ pa ụmụ atụnrụn rịn'a, a pa wẹ e che obi; o tu udọn e du ndị kị ụmụ.
12
Onyẹ a sa ẹka e gi ọb'ẹka ohu e kwọndọnchanrịn mirin ile rị ohimin mọbụ a shịapụ ọb'ẹka gi ẹ makwama igwere? Onyẹ gitu ụkpalị kwọndọn ẹjan ile rị ụwa mọbụ gi skelu ma ugu ile lẹ òke ile?
13
Onyẹ ghọta Mmọn Osolobuẹ mọbụ dụn a ọdụn?
14
Onyẹ kẹ Osolobuẹ kpọtu d'a kọwan'a ihiẹn? Onyẹ zin ẹ kẹ wẹ e mẹ ihiẹn rị mma? Onyẹ ye ẹ amamihiẹn? Onyẹ ye ẹ nghọta?
15
Alị ile nọhụ kẹ ntan-ntan mirin ohu rị imẹ igbeju; wẹ nyịnhanhụ kẹ uzunzun elu ihiẹn o gi a ma ihiẹn; O gihụ mkpịnsịn ẹka e deri alị ile rịdẹ mkpẹnrẹn ohimin lekẹ uzunzun riẹnni.
16
Ẹgboko-Lẹbanọnụ ile ezukọ fiye ọkụn chụnyen'ẹ ẹjan, anụ ile rịn'a ezukọ chụnyen'ẹ ẹjan.
17
Alị ile rị elu-ụwa enwọn ihiẹn wẹ wụ ẹnya a; onwọnni ihiẹn ọ kpọ wẹ, eruni wẹ ihiẹn anaị!
18
Onyẹ kẹ ụnụ e gi nwan jeni Chuku? Kịnị kẹ ụnụ k'a sị nị ịya k'o yi?
19
O mẹ nke mmọn wẹ kọma, omẹ-nka kpụ a, onyẹ a kpụ goru e gi goru nyankwama a, gi siliva kpan'a ẹgan.
20
Onyẹ salẹni ẹka kọma ụdị hụ a chọrị osisi ụtụ ghalẹni e gbu, chọrị omẹ-nka n'ọ pịnn'a mmọn jẹnkọlẹni d'a dan.
21
Ụnụ amarịn? Ụnụ e ke nụ? Agwanị wẹ ụnụ ya isi mbidọn? Ụnụ aghọtan'a kete w'e kelẹ ụwa?
22
Osolobuẹ nọdị alị ebe mẹ ohi-ohi ghahunmẹ ụwa, ndị ile bi elu ụwa rị kẹ kpamkpam ẹnya a. Ọ shịapụ igwere kẹ ịhara, ọ shịapụ a kẹ okpukpu ụlọ w'e bi.
23
Ọ napụ ndị-isi ọkịkị rị wẹ ẹka, a napụ ndị-ọkịkị ụwanị ihiẹn ile wẹ wụ.
24
O ke kẹrẹni wẹ hụ kụn wẹ, o ke kẹrẹni wẹ hụ ghaye wẹ, o ke kẹrẹni wẹ hụ gba akwanran ọ fụ wẹ ufere, e shinwụn wẹ, okẹn ufere e bupụ wẹ lekẹ ẹfịfịa-ọkpọnkụn.
25
“Onyẹ kẹ ụnụ e gi nwan jeni m? Onyẹ kẹ mmẹ lẹ ịya han?” Ịya kẹ Onyẹ ahụn rị nsọ ku.
26
Weshidẹ ni ẹnya elu lee igwere: Onyẹ ke ihiẹn ndịnị ile? Onyẹ hụ hụn a kịpụha kokisẹ ile ohu-ohu, a kpọ wẹ ẹfan. Onwọnni akpụ-ohu e tuhuni, Makẹni ọ wụ dikẹn nwọn ikẹn ọda-ọda,
27
Kị haịn i gi e ku ẹnịna, ebọn Jekọpụ, kị haịn i gi e dẹnnwịnwịn, Izrẹlụ, a sị, “Osolobuẹ amarịn k'ọ rị m; Chuku m a lagụọ oku m tọ”?
28
Y'a marịn? Y'e ke nụ? Osolobuẹ wụ Chuku hụn rị jẹnrin ejẹn, Onyẹ hụn ke ebe ile ụwa ru. Ndụn agụkọ a, ẹhụ arọkọ a, onwọnni onyẹ marịn kẹ nghọta a han.
29
O mẹ ndụn a ban ndị ndụn gụ, e yecheni ndị ndụn rịlẹni ikẹn.
30
Ndụn a gụdẹ ikoro, ẹhụ a rọ wẹ; ikorọbịa a kpọgburudẹ, a dan;
31
kanị nke ndị gi Osolobuẹ e dọn ẹnya, ndụn k'a banzị wẹ. Wẹ k'e fe imẹ-elu kẹ ugọn; wẹ k'a gba ọsọ, ndụn agụkọ wẹ; wẹ k'e jẹn ijẹn, asọhịkọ wẹ.
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc