Tun kilong’u atebwet age tugul, ak tun kiripribi tulwet age tugul ne o ak ne ming’in: ak tun kilititi che kunuren, ak kichaboi komoswek che sing’ortot:
Togoste tulwet ne koi inye ne imwachini logoiywek che miach Sion; waach mising’ eng’ kimnatet inye ne imwachini Jerusalem logoiywek che miach; waach, ameiywei; mwachi nganasokab Juda ilenji, Ogeer, Kamuktaindeng’wong’!
Ogeero, nyonei Kiptaiyat Jehovah ko u inendet ne kim, ak kobounisiei eunnyi agobo inendet: ogeero, mi melektanyi koboto inendet, ak mi yaaktaennyi tainnyi.
Ng’o ne kiger beek kogeer ole te, eng’ rubeitanyi, ak kokwa kipsengwet eng’ morikyik, ak konai ole te temburiekab ng’ony eng’ karogendoet, ak korogendo tulonok eng’ ratilisiek, koboto tulonok che mengechen eng’ kit ne kirogendoisie?
Ogeero, u bororiosiek beek che kasaita konyil agenge eng’ teret, ak kiiti ko u temburiek che tutigin che mi kit ne kirogendoisie: ogeero, inemu ngegusiek ko u kit ne ming’in mising’.
Chito ne banan mising’ agobo kagochinet ne u noto, ne kinamjin barak, koleweni ketit ne manunei; cheng’jingei musogindet ne ng’om si kolumda kanamwet ne kiwaei, ne maging’ei.
Inendet ko ne tebe ole boch yiemutietab ng’ony, ak u che menyei oloto, talamik; ne iitoi kipsengwetisiek ko u anget, ak koiito kipsengwetisiechoto ko u emait ne kimenyei:
Ee, kima komin ichek, ee, kima kigol ichek; ee, kima nam ng’ony tigitikwak: si koguut inendet ichek, ak koresyo, ak koib kipchurjuriet ichek ko u mobek.
Onyal barak, ogeer ole ng’o ne kitoi koyai chuto, ne imutu lugenywa kobee koitet: kuurei tugul eng’ kainaikwak, eng’ oindab kamugennyi, ak kim inendet eng’ kamuktaet, ma bet agot agenge.