Jerusalem hnênah thlamuanna thu hril thuai rawh u, An tuar tûr chu an tlâk ta a, Hrem an tuar hi a tâwk ta e, Lalpa kut pawh an sual lêt hnih an tuar tawh e.
En teh, Lalpa Pathian chu mi chak angin a lo kal a, A bân tha chak hmangin ro a rêl dâwn, A chhan chhuahte a rawn hruai a, A tlan chhuahte a rawn chhawm e.
Tu nge vei khat lekin tuifinriat teh sêng ang? Tu nge vân khi khâp chhuak thei le? Tu nge leia vaivut hi khova teh sêng awm ang? Tlâng leh mualte tu nge bûk thei?
Lalpa tân chuan hnam zawng zawng hi, Bâlṭin mawnga tui far khat ang, Bûkthlênga vaivut kai ang lek hi an ni; Thliarkârte pawh lungtê anga, Vawrh derh derh tham lek chauh an ni.
Ani hi zawng kâwlkil hual chung daihah a awm a, A chhûnga awmte chu a tân khauphâr ang lek an ni. Puanzâr angin vân khi a zâr pharh a, Awmna tûr puanin an zâr ang hian.
Thing phun lo chawr ṭan tîr, Thlai ṭiak zung thlâk ṭan chauh ang hi an ni. Thliin a rawn chhêm a, a vuai ta a, Thlipui a lo thawk a, Buhpâwl angin a la bo ṭhîn.
Vân lamah khian in mit lên chho ula, In hmuhte khi tu siam nge ni? Sipai rual ang maia hruai chhuak ṭhîntu, An hming chhiara ko ṭheuh theitu siam vek a ni; Thil a ti thei êm a, pakhat tê mah an bo ngai lo.
In hre na nge? Lalpa chauh hi chatuan Pathian chu a ni a, Kâwlkil hual chhûnga awm zawng zawng hi Ama siam vek a ni. A chau lo va, a hah ngai bawk hek lo. A finzia pawh tu mah hre phâk an awm loh hi, In hre ngai lo vem ni?
Lalpa nghâktute erawh chu An chak thar leh ang a, Mupui angin thlain an thlâwk chho vang, An tlân ang a, an chau lo vang, An kal ang a, an hah hek lo vang.