यरूशलेमका मानिसहरूलाई साहस देओ, तिनीहरूलाई भन कि तिनीहरूले लामो समयदेखि कष्ट भोगेका छन् र अहिले तिनीहरूका पाप क्षमा भएको छ। तिनीहरूका पापको लागि मैले तिनीहरूलाई पूरा दण्ड दिएको छु।”
हे यरूशलेम, अग्लो पर्वतमाथि जा र यो शुभ समाचार सुना! हे सियोन, ठूलो सोर उचाल् र यो शुभ समाचार भन्! नडराई बोल्। यहूदा सहरलाई भन् कि तिनीहरूका परमेश्वर आउँदै हुनुहुन्छ!
के कसैले समुद्रलाई आफ्नो हत्केलाले वा आकाशलाई आफ्नो हातले नाप्न सक्छ? के कसैले पृथ्वीको माटो डालोमा राख्न वा डाँडा र पर्वत तराजुले जोख्न सक्छ?
पृथ्वीमाथि आकाशभन्दा उच्चमा आफ्नो सिंहासनमा विराजमान हुनुहुनेले त्यो बनाउनुभएको हो, तलका मानिसहरू फटेङ्ग्राजस्ता छन्। बास बस्नलाई पाल टाँगेजस्तो वा पर्दा टाँगेजस्तो उहाँले आकाशलाई टाँग्नुभयो।
आकाशतिर हेर! तिमीले देखेका ताराहरू कसले बनाए? उहाँले ती असङ्ख्य ताराहरूलाई पनि गन्ती गरी नाउँ काढेर बोलाउनुहुन्छ! उहाँको महान् शक्तिले गर्दा तीमध्ये एउटा पनि छोडिनेछैन!
के तँ जान्दैनस्? के सुनेको छैनस्? परमप्रभु अनन्तको परमेश्वर हुनुहुन्छ, उहाँले सारा संसार बनाउनुभयो। उहाँ कहिल्यै थाक्नुहुन्न, कहिल्यै गल्नुहुन्न, उहाँका विचार कसैले बुझ्दैनन्।
तर ज-जसले परमप्रभुमाथि मद्दतको लागि भरोसा राख्दछन्, तिनीहरूले फेरि नयाँ बल पाउँदछन्। तिनीहरू चिलझैँ मास्तिर उड्नेछन्। दगुरेर पनि थाक्नेछैनन्। तिनीहरू हिँड्नेछन् तर गल्नेछैनन्।