1
“Inwe ebisinka ne chinse chire ang’e nenyancha, mokire‐kiri, montegerere, tiga abanto b’ebisaku banyore chinguru chinyia, tiga basuke gocha ang’e, bakwane; toche amo, toike ang’e ase ekina.
2
“Ning’o orangeretie oyomo korwa moocha, oria oumeranete nobobui aande onsi ase agendete? Ere nigo akobeka abanto b’ebisaku inse y’okobua kwaye, erinde atachere abaruoti inse y’amagoro aye; oyio nigo agoita abanto b’ebisaku nomoro, obakora baba buna orotu, na ase obota bwaye nigo akobasiarera buna obonyansi obwomo.
3
Nigo akobabwatia, oeta na orendire buya, ase chinchera atana goeta rinde.
4
Ning’o okorete na goikerania aya? Ning’o orangeretie ebiaare bi’abanto korwa omochakano? Ninche Omonene, ninche oyo bw’omochakano; ninche oyo bw’omoerio, ninche Ere.”
5
Ebisinka ne chinse chire ang’e nenyancha chiarorire ayio chiamwoboire, chinsinyo chi’ense nigo chigotengechigwa; chiasukire gocha ang’e.
6
Kera omonto nigo agokonya omogisangio oye; oyomo otebia oyonde, “Kabe omoremu!”
7
Omosenia bwe chibao nigo akobeka omoturi bw’etahabu omokia, na omoturi ebioma obeka omoturagi chinguru, oteba, “Oborembo bw’okobwatania nobuya.” Erio babwatania omogwekano nemesumari tonyegera.
8
“Korende inwe Abaisraeli, abasomba baane, inwe nabanto ba Yakobo nachorete, inwe nigo more ab’ororeria rwa Ibrahimu, omosani one.
9
Nigo nabarusetie korwa ase chinsinyo chi’ense, nkabarangeria korwa ase chinsinyo chi’aare mono, nkabatebia: Inwe nabasomba baane, nabachorire, timbaangeti.
10
Ase ayio timoiroka, inche nigo inde amo nainwe, timoichana, inche ninche Nyasae oino; nimbabeke chinguru, mbakonye, nimbasiire nokoboko gw’okorio kw’oboronge bwane.
11
“Rora, abwo bonsi babagechete mbasookigwe na gotantanigwa; abwo bakobaengereria mbabe bosa basirigwe.
12
Nigo morabarigie abwo bakobasoera, ko timokobanyora; abwo barenge kobarwania nigo barabe bosa kegima.
13
Ninche Omonene, Nyasae oino, nimbabwate amaboko aino a borio. Ninche nkobatebia inwe: Timoiroka, nimbakonye.
14
“Inwe ororeria rwa Yakobo ronga buna rikonde, inwe ekeombe egeke ki’Abaisraeli, timoiroka! Inche Omonene nimbakonye. Ninche Omochenu bw’Abaisraeli inde Omobooria oino.” Nabo Omonene atebire.
15
“Rora, nimbakore inwe mobe egekorero gi’okoora, kere ekiya na kere namaara amoge; inwe moore ebitunwa, mobisamunyore, imokore ebigoro bibe buna omoiriro.
16
Mobisiare, na omwaga obirurukie gochia aare, erio ekembugu‐mbugu kebisiarere. Inwe abanyene mogoke ase Omonene na komwetogeria oyore Omochenu bw’Abaisraeli.
17
“Ekero abataka na abaremeire barabe bakorigia amache na tibayanyora, ekero chimeme chiabo chirabe chiabwatanire namang’ang’ura; inche Omonene nimbaigwe, inche Nyasae bw’Abaisraeli tinkobatiga.
18
Nindete chindooche korwa ase ebigoro ebiomo, ne chinsoko nchituboke ase amagoko ime; ning’onchore erooro ebe ritibo ri’amache, na ense enyomo ebe ne chinsoko chire namache.
19
Nimerie emecharake ase erooro, boigo nimerie aroro emekonge, na emeadasi, na emezeituni. Ee, nimerie emetarakwa na emete
20
ende egwekaine emeuru, na emebeno amo, erinde abanto mbarore na komanya, naende mbarengererie bamanye bonsi amo, ng’a nokoboko kw’Omonene gwakorire ayio, ee, ere oyore Omochenu bw’Abaisraeli nere otongete ebio bionsi.”
21
Omonene, Omoruoti bw’abanto ba Yakobo, nigo agoteba iga: “Renta amang’ana aino, renta oborori bwaino botoenekerie.
22
Tiga baborente bototebie aya agochia koba; tiga bototebie amang’ana a kare buna arenge, erinde tonyare koyarengereria na komanya buna aikeranetigwe, naende botoorokerie buna amang’ana agochia koba.
23
Totebie aya agochi‐gocha, erinde tomanye ng’a inwe ne chinyasae; kora amang’ana amaya, gose amabe erinde tokorora ayio tokumie.
24
Naama! Inwe nigo more bosa kegima, na emeremo yaino nero mbosa kegima; oyo obachorire inwe na kobasasima nigo are okogechia.
25
“Inarangeretie omonto korwa sugusu, ere ochire; ee, nigo namorusirie korwa moocha, ere narangerie erieta riane akonywe, natiringere abagambi inse buna esike egotiringwa, na buna omokori chinyongo agotiringa esike.
26
Ning’o obanete amang’ana ayio agwo kare, erinde tonyare komanya ng’a amang’ana oyio atebete nay’ekeene? Onde tari nonya noyomo oyaorogetie na koyararia; onde tari oigwete komokoyakwana.
27
Ninche Omonene nigo narenge omotang’ani gotebia Sayoni: Rigereria, morore abwo! Ninche narenterete Yerusalemu abwo bararetie amang’ana amaya.
28
Korende ekero narigereretie tinaroche monto onde, nonya nase egati yabo mosemia onde tarengeo; ekero naboretie, onde tarengeo ong’iraneretie.
29
Naama! Chinyasae echio chionsi mbosa. Emeremo eyio y’abanto nigo ere bosa kegima, ee, emegwekano eyio abanto babombete nigo enga embeo bosa.”
Gussi Bible 2020
OLD EKEGUSII BIBLE PROTESTANT EDITION Bible Society of Kenya, 2020